ជីដូនជនជាតិប៉ាឡេស្ទីនម្នាក់ ស្ថិតក្នុងចំណោមពលរដ្ឋហ្កាហ្សារាប់ពាន់នាក់ ដែលពឹងផ្អែកលើផ្ទះបាយសហគមន៍សម្រាប់អាហារ។

អ្នកស្រី បានយកឆ្នាំងមកដោយខ្លួនឯង ហើយត្រូវរង់ចាំឲ្យគេដាក់អាហារមុនយកទៅផ្ទះដើម្បីផ្តល់ឲ្យកូនៗ និងចៅៗរបស់គាត់។

អ្នកស្រី Al-Talalaqa និយាយថា «ខ្ញុំបានទទួលអាហារ បន្ទាប់ពីឈរនៅក្រោមកម្តៅព្រះអាទិត្យរយៈពេល ៤ម៉ោង ហើយខ្ញុំពិតជាអស់កម្លាំង»។ ខណៈពិបាក ដូចជាក្នុងការធ្វើដំណើររបស់អ្នកស្រី ការស្វែងរកអាហារអាចកាន់តែពិបាក ព្រោះផ្ទះបាយសហគមន៍នៅតំបន់ហ្កាហ្សា នឹងគ្មានអាហារក្នុងពេលឆាប់ៗសម្រាប់ការផ្គត់ផ្គង់ទៀតទេ។

ចាប់តាំងពីថ្ងៃទី២ ខែមីនាមក អ៊ីស្រាអែលបានកាត់ផ្តាច់ការផ្គត់ផ្គង់ទាំងស្រុងដល់ប្រជាជន ២,៣ លាននាក់នៅតំបន់ហ្កាហ្សាស្ទ្រីប ជាការបិទច្រកដ៏យូរបំផុតមិនធ្លាប់មានពីមុនមក។

ស្បៀងអាហារដែលស្តុកទុកក្នុងអំឡុងពេលបទឈប់បាញ់កាលពីដើមឆ្នាំ បានអស់ ខណៈស្ថានភាពអាហារូបត្ថម្ភនៅតំបន់ហ្កាហ្សា កាន់តែអាក្រក់ទៅៗ។

របាយការណ៍របស់អង្គការសហប្រជាជាតិ បានរកឃើញករណីកង្វះអាហារូបត្ថម្ភប្រហែល ១០.០០០ករណី ក្នុងចំណោមកុមារនៅទូទាំងតំបន់ហ្កាហ្សា ចាប់តាំងពីដើមឆ្នាំ ២០២៥មក ។

អាជ្ញាធរសុខាភិបាលតំបន់ហ្កាហ្សា បាននិយាយថា កុមារយ៉ាងហោចណាស់ ៦០.០០០ នាក់ បច្ចុប្បន្ននេះកំពុងបង្ហាញសញ្ញានៃកង្វះអាហារូបត្ថម្ភ។ កន្លងមក អ៊ីស្រាអែល បានបដិសេធថា តំបន់ហ្កាហ្សាមិនប្រឈមនឹងវិបត្តិភាពអត់ឃ្លាននោះទេ និងបាននិយាយថា នៅតែមានជំនួយគ្រប់គ្រាន់ ដើម្បីទ្រទ្រង់ចំនួនប្រជាជននៅតំបន់ហ៊ុមព័ទ្ធមួយនេះ។