​អាមេរិក៖ ក្រសួងការបរទេស​បាន​និយាយ​ថា សហរដ្ឋអាមេរិក​នឹង​បន្ត​កិច្ចចរចា​នុយក្លេអ៊ែរ​ដោយ​ប្រយោល ​ជាមួយ​អ៊ីរ៉ង់​នៅ​ទីក្រុង​វី​យែ​ន ប្រទេស​អូទ្រីស ដោយ​និយាយ​ថា រដ្ឋបាល​លោក Biden កំពុង​ផ្តល់ "​ឱកាស​ការទូត​មួយ​ផ្សេងទៀត​" ដល់​អ៊ីរ៉ង់ បន្ទាប់ពី​មានការ​រីកចម្រើន​តិចតួច​ក្នុង​ការ​ពិភាក្សា​កាលពី​សប្តាហ៍​មុន​។​

​អ្នកនាំពាក្យ​ក្រសួងការបរទេស​អាមេរិកលោក Ned Price បាន​ប្រាប់​អ្នកយកព័ត៌មាន​កាលពី​ថ្ងៃ​ពុធ​ថា បេសកជន​ពិសេស​របស់​រដ្ឋបាលលោក Biden ទទួលបន្ទុក​ប​ញ្ហា​នៅ​ប្រទេស​អ៊ីរ៉ង់លោក Robert Malley និង​គណៈប្រតិភូ​របស់​លោកគ្រោង​នឹងចូលរួម​កិច្ចពិភាក្សា​នៅ​ចុង​សប្តាហ៍​នេះ​។​ ​អ្នកការទូត​ជាន់ខ្ពស់​អឺរ៉ុប​លោក Enrique Mora បានបញ្ជាក់​នៅមុន​ថ្ងៃ​ដែល​ការចរចា​នឹង​បន្ត​នៅ​ថ្ងៃ​ព្រហស្បតិ៍ បន្ទាប់ពី​កិច្ចចរចា​លើក​ទី​៧ ត្រូវបាន​ផ្អាក​កាលពី​ថ្ងៃ​សុក្រ​កន្លង​។​

ក្រុមមន្ត្រី​អាមេរិក និង​អឺរ៉ុបបាន​ចោទសួរ​ពី​ឆន្ទៈ​របស់​អ៊ីរ៉ង់​ក្នុងការ​ស្តារឡើងវិញ​ នូវ​កតិកាសញ្ញាដែល​ត្រូវបាន​គេ​ស្គាល់​ជា​ផ្លូវការ​ថា ​ជា​ផែនការ​សកម្មភាព​រួម​គ្រប់​ជ្រុងជ្រោយ (JCPOA) បន្ទាប់ពី​ការចរចា​កាលពី​សប្តាហ៍​មុនជា​លើកដំបូង​ ក្រោម​ការដឹកនាំ​របស់​ប្រធានាធិបតី​អ៊ីរ៉ង់​លោក Ebrahim Raisi។​ ​លោក Price បាន​និយាយថា​ ការចរចា​ត្រូវបាន​ផ្អាក​កាលពី​ថ្ងៃ​សុក្រ​ តិចជាង​មួយ​សប្តាហ៍​បន្ទាប់ពី​ពួកគេបានចាប់ផ្តើម​ព្រោះ​វាច្បាស់​ណាស់ថា ​អ៊ីរ៉ង់មិនបាន​មកជា​មួយ​នូវគោលបំណង​ច្បាស់លាស់។ ប៉ុន្តែ​លោក​បាន​បន្ថែមថា ការស្ដារ​កិច្ចព្រមព្រៀង​ឡើងវិញ​នេះ​នៅតែ​ជាជម្រើស​ដែល​អាច​សម្រេច​បាន​៕

អត្ថបទ៖ សុខមាន