អ្នកស្រុកនៅទីក្រុងម៉ិកស៊ិក ប្រទេសម៉ិកស៊ិក បានជម្លៀសខ្លួនចេញពីអគារ និងលំនៅឋាន សម្រាប់ការធ្វើសមយុទ្ធរញ្ជួយដីបន្ទាន់មួយ។ អាជ្ញាធរ បានចុចកណ្តឹងប្រកាសអំពីការរញ្ជួយដីនៅក្នុងទីក្រុងម៉ិកស៊ិក ហើយបុគ្គលិកការិយាល័យ បានចាប់ផ្តើមរត់ដើម្បីជម្លៀសខ្លួនបន្ទាន់ចេញពីអគារ។

សមយុទ្ធនេះ បាននាំមកនូវការរំលឹកដ៏តក់ស្លុតសម្រាប់មនុស្សជាច្រើនរស់នៅក្នុងទីក្រុង។ កាលពីឆ្នាំ ២០១៧ ការរញ្ជួយដីកម្រិត ៧,១ រិចទ័រ បានវាយប្រហារប្រទេសម៉ិកស៊ិកភាគកណ្តាល ប៉ុន្មានម៉ោងបន្ទាប់ពីសមយុទ្ធជម្លៀសខ្លួន។ រញ្ជួយដីនោះ បានបណ្តាលឲ្យមនុស្ស៣៧០នាក់ស្លាប់ ភាគច្រើននៃអ្នកដែលបានស្លាប់រស់នៅក្នុងរដ្ឋធានី។ អគាររាប់សិបពាន់ខ្នងត្រូវរងការបំផ្លាញ ហើយមនុស្សរាប់សិបនាក់បានស្លាប់ដោយសារសាលារៀន និងការិយាល័យ បានបាក់រលំ។

រំញ័រ បានអង្រួនប្រទេសនេះក្នុងរយៈពេល១២ថ្ងៃ បន្ទាប់ពីការរញ្ជួយដីដែលមានកម្លាំងខ្លាំង ដាច់ដោយឡែកមួយបានវាយប្រហារនៅឆ្នេរសមុទ្រភាគនិរតីរបស់ប្រទេស ដោយបានសម្លាប់មនុស្សប្រហែល១០០ នាក់។

ដោយត្រឡប់ទៅក្នុងឆ្នាំ១៩៨៥ ការរញ្ជួយដីដ៏ធំមួយ បានសម្លាប់មនុស្សរាប់ពាន់នាក់។