ប្រធានាធិបតីរុស្ស៊ី លោក Vladimir Putin ត្រូវបានគេរាយការណ៍ថា កំពុងទាមទារដែនដីដែលទីក្រុងមូស្គូមិនទាន់បានកាន់កាប់ទាំងស្រុង នាពេលបច្ចុប្បន្ន ជាលក្ខខណ្ឌដើម្បីបញ្ចប់សង្រ្គាម នៅអ៊ុយក្រែន ដែលអាចបង្កការស្មុគស្មាញដល់កិច្ចប្រឹងប្រែងសន្តិភាពបន្ថែមទៀត។

កាលពីថ្ងៃអង្គារ (ទី២៩ ខែមេសា) សារព័ត៌មាន Bloomberg បានរាយការណ៍ថា តំបន់ចំនួន ៤ ដែលស្ថិតនៅក្នុងការទាមទារនោះ គឺ Donetsk, Luhansk, Zaporizhzhia និង Kherson។ រុស្ស៊ីបានធ្វើប្រជាមតិនៅក្នុងតំបន់ទាំង ៤ នេះ នៅប៉ុន្មានខែបន្ទាប់ពីការលុកលុយ ហើយលោក Putin បាននិយាយថា ដែនដីទាំងនេះនឹងក្លាយជាផ្នែករបស់ប្រទេសរុស្ស៊ីរៀងរហូត ខណៈដែលលទ្ធផលនោះមិនត្រូវបានទទួលស្គាល់ដោយសហគមន៍អន្តរជាតិភាគច្រើន។ អគ្គលេខាធិការអង្គការសហប្រជាជាតិ (UN) លោក Antonio Guterres បានហៅការធ្វើប្រជាមតិនេះថា ជាការរំលោភលើធម្មនុញ្ញ UN និងច្បាប់អន្តរជាតិ។

ទីក្រុងមូស្គូមិនទាន់បានដណ្តើមគ្រប់គ្រងទាំងស្រុងលើតំបន់ទាំងអស់នោះទេ ប៉ុន្តែបណ្តាញសារព័ត៌មានបានផ្សព្វផ្សាយថា លោក Putin ចង់ឲ្យតំបន់ទាំងនោះក្លាយជាលក្ខខណ្ឌមួយ ក្នុងចំណោមលក្ខខណ្ឌរបស់លោក ដើម្បីបញ្ចប់សង្គ្រាម។ ដោយដកស្រង់សម្តីពីបុគ្គលដែលដឹងពីបញ្ហានេះ សារព័ត៌មាន Bloomberg បានឲ្យដឹងបន្ថែមថា បេសកជនរបស់លោក Donald Trump លោក Steve Witkoff បានព្យាយាមបញ្ចុះបញ្ចូលឲ្យលោកយល់ព្រមលើបទឈប់បាញ់នៅតាមខ្សែត្រៀមជួរមុខបច្ចុប្បន្ន ប៉ុន្តែលោក Putin បានបង្ហាញគោលជំហរយ៉ាងរឹងមាំតាមការទាមទាររបស់លោក។

រដ្ឋបាលរបស់លោក Trump បានប្រាប់ថា ខ្លួននឹងដើរចេញពីកិច្ចពិភាក្សាសន្ដិភាពនេះ ប្រសិនបើកិច្ចព្រមព្រៀងមិនត្រូវបានប្រកាសក្នុងពេលឆាប់ៗនេះទេ។ ប៉ុន្តែលោក Trump បានផ្លាស់ប្តូរឥរិយាបថរបស់លោកលើប្រធានាធិបតីអ៊ុយក្រែន លោក Volodymyr Zelensky បន្ទាប់ពីបានជួបគ្នា នៅបុរីវ៉ាទីកង់ ក្នុងអំឡុងពេលពិធីបុណ្យព្រះសពរបស់សម្តេច ប៉ាប ហ្វ្រង់ស៊ីស ដោយបានរិះគន់លោក Putin ជាងពេលមុន៕