សម្ព័ន្ធមិត្តដ៏សំខាន់របស់លោក Vladimir Putin បានព្រមានថា រុស្ស៊ីអាចវាយប្រហារសមាជិករបស់អង្គការណាតូដោយអាវុធនុយក្លេអ៊ែរ ខណៈដែលលោកបានរិះគន់ធ្ងន់ៗលើប្រទេសស៊ុយអែត និងហ្វាំងឡង់ដែលចូលរួមក្នុងជាមួយសម្ព័ន្ធភាពយោធានេះនេះ។

លោក Dmitry Medvedev អតីតនាយករដ្ឋមន្ត្រី និងជាអនុប្រធានក្រុមប្រឹក្សាសន្តិសុខរុស្ស៊ី បាននិយាយថា ប្រទេសអឺរ៉ុបខាងជើងទាំង ២ បាន «ក្លាយជាគោលដៅដោយស្វ័យប្រវត្តិ សម្រាប់កងកម្លាំងប្រដាប់អាវុធរបស់យើង»។

លោកបានបញ្ជាក់ថា៖ «ពួកគេជាផ្នែកមួយនៃប្លុកដែលមានអរិភាពជាមួយយើង ដែលមានន័យថា ពួកគេក្លាយជាគោលដៅដោយស្វ័យប្រវត្តិសម្រាប់កងកម្លាំងប្រដាប់អាវុធរបស់យើង ក្នុងនោះរួមទាំងការវាយប្រហារសងសឹក និងសូម្បីតែសមាសធាតុនុយក្លេអ៊ែរ ឬវិធានការបង្ការ»។

គួរបញ្ជាក់ថា លោក Medvedev គឺជាអ្នកប្រឆាំងលោកខាងលិច ហើយបានធ្វើការគំរាមកំហែងប្រើប្រាស់អាវុធនុយក្លេអ៊ែរម្តងហើយម្តងទៀត ចាប់តាំងពីរុស្ស៊ីបានលុកលុយអ៊ុយក្រែន ក្នុងខែកុម្ភៈ ឆ្នាំ២០២២៕