អាមេរិក៖ ​លោក​ប្រធានាធិបតី Joe Biden បាន​និយាយ​កាលពី​ថ្ងៃ​ពុធ​ថា រដ្ឋបាល​របស់លោក​មិន​ពិចារណា​ក្នុងការ​បញ្ជូនទាហាន​អាមេរិកទៅកាន់​អ៊ុយ​ក្រែ​ន​ទេ ស្របពេល​មាន​ក្ដីបារម្ភ​ពី​ការបង្កើន​កម្លាំងយោធា​រុស្ស៊ី​ នៅតាម​ព្រំដែន​រួមជាមួយ​អ៊ុយ​ក្រែ​ន​នោះ​។​ ​លោក Biden បាន​ប្រាប់​អ្នកយកព័ត៌មាន​នៅឯ​សេត​វិមាន​ថា ការបញ្ជូន​កងទ័ព​ជា​ឯកតោភាគី​ទៅ​អ៊ុយ​ក្រែ​ន​មិនមែនជា​ជម្រើស​ទេ។

ប្រសិនបើ​អ្នក​ឈ្លានពាន​អ៊ុយ​ក្រែ​ននឹងមាន​ផលវិបាក​ធ្ងន់ធ្ងរ​។ ពិសេសគឺ​ផលវិបាក​សេដ្ឋកិច្ច​។ ប្រធានាធិបតី​បាន​និយាយថា លោក​ដឹង​រឿងនេះដោយ​យោងទៅលើ​អ្វីដែល​លោក​បាន​ប្រាប់​ប្រធានាធិបតី​រុស្ស៊ី Vladimir Putin តាម​វីដេអូ​រយៈពេល​ពីរ​ម៉ោង​កាល​ពីមួយ​ថ្ងៃមុន​។​ ​លោក Biden បាន​និយាយថា ជំនួស​ឱ្យ​ការបញ្ជូន​កងទ័ព​អាមេរិក​ទៅកាន់​អ៊ុយ​ក្រែ​ន រដ្ឋបាល​របស់លោក​នឹង​ធ្វើការ​ដើម្បី​ពង្រឹង​វត្តមាន​យោធា​អាមេរិក​ នៅក្នុង​បណ្តា​ប្រទេស​ជា​សមាជិក​អង្គការ​ណា​តូ​។​ ​ក្នុងអំឡុង​ជំនួប​តាម​វីដេអូរវាង​មេដឹកនាំ​ទាំងពីរនៅ​វិមាន​ក្រឹម​ឡាំង លោក Putin បាន​សង្កត់ធ្ងន់​ទៅកាន់​លោក Biden ថា អង្គការ ​NATO ជា​អ្នកទទួលខុសត្រូវ​ចំពោះ​ការបង្កើន​ភាព​តានតឹង​នៅតាម​ព្រំដែន​របស់​រុស្ស៊ី ហើយបាន​ចោទប្រកាន់​សម្ព័ន្ធមិត្ត​ដែលមាន​សមាជិក ៣០ប្រទេសថា ​បាន​បង្កើត​កម្លាំងយោធា​នៅក្នុង​បណ្ដា​រដ្ឋ​ដែល​នៅជាប់​នឹង​ប្រទេស​រុស្ស៊ី​។​

​ទោះបីជា​វិមាន​ក្រឹម​ឡាំង​បាន​ច្រានចោល​ការលើកឡើង​ដែលថា​ ទីក្រុង​មូ​ស្គូ​កំពុង​ត្រៀម​សម្រាប់​ការវាយប្រហារ​លើ​អ៊ុយ​ក្រែ​ន​ក៏ដោយ លោក Putin បាន​ប្រា​ប់លោក Biden តាម​វីដេអូថា ការទទូច​របស់​អ៊ុយ​ក្រែ​ន​ក្នុងការ​ចូលរួម​ជា​សមាជិក​អង្គការ​ណា​តូ​ ត្រូវតែ​ត្រូវបានបដិសេធ​ជា​ថ្នូរ​នឹង​ការធានា​ដែលថា​ ទាហាន​រុស្ស៊ី​នឹងមិន​ធ្វើការ​វាយប្រហារ​។ ​លោក Biden មិន​ទទួលយក​ថា អាមេរិកឆ្លង​ហួស​បន្ទាត់ក្រហមដែល​លោក Putin បាន​និយាយ​ពាក់ព័ន្ធ​នឹង​បញ្ហា​អ៊ុយ​ក្រែ​ននោះទេ ក្នុងអំឡុង​ជំនួប​តាម​វីដេអូ​ពោ​ពេញ​ដោយ​ភាព​តានតឹង​របស់​មេដឹកនាំ​ទាំង​២ ​កាលពី​ថ្ងៃ​អង្គារ​៕

អត្ថបទ៖ សុខមាន