រដ្ឋាភិបាល នៅថ្ងៃពុធ (ទី៣០ ខែមេសា) នេះ បានប្រាប់ឲ្យដឹងថា ច្បាប់ថ្មីរបស់ប្រទេសស្វីសដែលដាក់បម្រាមលើក្រុមហាម៉ាស និងអង្គការពាក់ព័ន្ធផ្សេងទៀត នឹងចូលជាធរមាននៅថ្ងៃទី១៥ ខែឧសភា ជាចំណាត់ការដែលត្រូវបានធ្វើឡើង ក្នុងគោលបំណងរារាំងក្រុមសកម្មប្រយុទ្ធប៉ាឡេស្ទីនកុំឲ្យប្រើប្រាស់ប្រទេសស្វីសជាជម្រកសុវត្ថិភាព ដោយធ្វើឲ្យកាន់តែងាយស្រួលដល់ការរៀបចំ សម្រាប់ដំណើរការហាមឃាត់មិនឲ្យចូល ឬការបណ្តេញចេញ។

រដ្ឋាភិបាលបាននិយាយថា ច្បាប់ដែលត្រូវបានអនុម័តដោយសភាកាលពីខែធ្នូមុន និងបានកើតឡើងបន្ទាប់ពីមានការវាយប្រហាររបស់ពួកហាម៉ាសលើអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ផ្តល់ឲ្យអាជ្ញាធរស្វីសនូវ «មធ្យោបាយចាំបាច់ ក្នុងការចាត់វិធានការប្រឆាំងនឹងសកម្មភាពរបស់ក្រុមហាម៉ាស ឬការគាំទ្រចំពោះអង្គការ នៅក្នុងប្រទេសស្វីស»។

គួរបញ្ជាក់ថា បើយោងតាមអ៊ីស្រាអែល បានឲ្យដឹងថា សង្គ្រាមនៅតំបន់ហ្កាហ្សា បានចាប់ផ្តើមបន្ទាប់ពីមានការវាយប្រហាររបស់ក្រុមហាម៉ាសដែលបានសម្លាប់មនុស្សចំនួន ១.២០០នាក់ និងបានចាប់មនុស្សជាចំណាប់ថ្នូរ ២៥១នាក់យកទៅតំបន់ហ្កាហ្សា។ ហើយបើយោងតាមមន្ត្រីសុខាភិបាលប៉ាឡេស្ទីនក្នុងតំបន់នេះ បានឲ្យដឹងថា ចាប់តាំងពីពេលនោះមក ការវាយលុករបស់អ៊ីស្រាអែលលើដែនដីនេះ បានសម្លាប់មនុស្សជាង ៥២.០០០នាក់។

ច្បាប់របស់ស្វីស អនុញ្ញាតឲ្យមានវិធានការការពាររបស់នគរបាល ដូចជាហាមឃាត់មិនឲ្យចូល ឬបណ្តេញចេញ ហើយថែមទាំងផ្ដល់ការលំបាកបន្ថែមទៀតដល់ក្រុមហាម៉ាស ក្នុងការយកប្រទេសស្វីសប្រើប្រាស់ជាមជ្ឈមណ្ឌលហិរញ្ញវត្ថុ សម្រាប់សកម្មភាពរបស់ខ្លួន៕