មន្ត្រីទីភ្នាក់ងារសន្តិសុខ SBU បានប្រាប់សារព័ត៌មាន Reuters នៅថ្ងៃពុធនេះថា ទីភ្នាក់ងាររបស់ប្រទេសអ៊ុយក្រែនមួយនេះ បានទទួលខុសត្រូវចំពោះការវាយប្រហារដោយយានដ្រូនលើរោងចក្រផលិតគ្រឿងយុទ្ធោបករណ៍ ក្នុងប្រទេសរុស្ស៊ី។

មន្ត្រីរូបនេះបាននិយាយថា ការវាយប្រហារនេះ គឺមានលើអាគាររោងចក្រ នៅទីក្រុង Murom ដែលចម្ងាយ ៣០០គីឡូម៉ែត្រ ភាគខាងកើតទីក្រុងមូស្គូ ហើយបើយោងទៅតាមស្ថាប័នដាក់ទណ្ឌកម្មរបស់សហភាពអឺរ៉ុប បានឲ្យដឹងថា រោងចក្រនេះផលិតសមាសធាតុ សម្រាប់គ្រាប់រំសេវយោធា។

ប្រភពពី SBU បាននិយាយថា រោងចក្រនេះផលិតឧបករណ៍ និងសមាសធាតុគ្រាប់រំសេវ សម្រាប់កងទ័ពជើងទឹក និងអាកាសចរណ៍យោធារបស់រុស្ស៊ី។

លោក Alexander Avdeev អភិបាលតំបន់ Vladimir របស់រុស្ស៊ី បានរាយការណ៍ថា មានអគ្គិភ័យឆាបឆេះទំហំ ៧២០ម៉ែត្រការ៉េ ដែលបង្កឡើងដោយយានដ្រូន ធ្លាក់លើសហគ្រាសមួយ ក្នុងទីក្រុង Murom ហើយបាននិយាយថា មិនមានអ្នករងរបួសនោះទេ។

លោក Avdeev បានបន្តថា អគារចំនួន ២ខ្នង រួមទាំងកន្លែងស្តុកផងដែរ ត្រូវរងខូចខាតដោយសារការវាយប្រហារដោយយានដ្រូន។ លោកបានបន្ថែមថា បុគ្គលិកសេវាសង្គ្រោះបន្ទាន់ចំនួន ៤៥នាក់ បានប្រើប្រាស់ឧបករណ៍ ១៤គ្រឿង ដើម្បីពន្លត់អគ្គិភ័យនោះ៕