​

ចំនួនក្របីនៅប្រទេសអ៊ីរ៉ាក់ បានធ្លាក់ចុះជាងពាក់កណ្តាល ក្នុងរយៈពេល ១ទសវត្សរ៍កន្លងមកនេះ ពេលដែលទន្លេសំខាន់ទាំង ២ គឺទន្លេ Tigris និងទន្លេ Euphrates របស់ប្រទេសមួយនេះ បានជួបគ្រោះរាំងស្ងួតធ្ងន់ធ្ងរ ធ្វើឲ្យគ្រោះថ្នាក់ដល់ជីវិតរស់នៅប្រចាំថ្ងៃរបស់ប្រជាកសិករ និងអ្នកចិញ្ចឹមសត្វ ។

លោក Sabah Ismail វ័យ ៣៨ឆ្នាំ ដែលជាកសិករចិញ្ចឹមក្របីនៅខេត្តភាគខាងត្បូង Dhi Qar និយាយថា មនុស្សបានចាកចេញទៅអស់ ពួកយើងនៅសស់ផ្ទះប៉ុន្មានខ្នងប៉ុណ្ណោះ ។

លោកបន្តថា ស្ថានភាពពិតជាពិបាក កាលពីមុនលោកមានក្របីចន្លោះពី ១២០ក្បាល ទៅ ១៣០ក្បាល ប៉ុន្តែឥឡូវលោកមានសត្វក្របីត្រឹម ៥០-៦០ក្បាលប៉ុណ្ណោះ ។ ក្របីមួយចំនួនបានងាប់អស់ ហើយពួកយើងក៏បានលក់ក្របីខ្លះ ដោយសារតែគ្រោះរាំងស្ងួត ។

សត្វក្របីត្រូវបានចិញ្ចឹមអស់រយៈពេលជាច្រើនសតវត្សរ៍មកហើយនៅប្រទេសអ៊ីរ៉ាក់ ដើម្បីយកទឹកដោះ ហើយត្រូវបានចារនៅក្នុងសិលាចារឹកអរិយធម៌បុរាណស៊ូមើរី នៅតំបន់នោះផងដែរ ។

យោងតាមការអះអាងរបស់អ្នកជំនាញដីល្បាប់លោក Jassim al-Assadi បានឲ្យដឹងថា ឫសគល់នៃវិបត្តិទឹកនាំឲ្យកសិករចាកចេញពីតំបន់ជនបទ គឺបម្រែបម្រួលអាកាសធាតុ ការធ្វើទំនប់ទឹកខ្សែទឹកខាងលើនៅប្រទេសទួរគី និងអ៊ីរ៉ង់ បច្ចេកទេសស្រោចស្រពក្នុងស្រុកហួសសម័យ និងកង្វះខាតផែនការគ្រប់គ្រងធនធានទឹករយៈពេលយូរ ។

លោក Jassim និយាយប្រាប់ទីភ្នាក់ងារព័ត៌មានរ៉យទ័រថា ចំនួនក្របីនៅក្នុងប្រទេសអ៊ីរ៉ាក់ បានធ្លាក់ចុះចាប់តាំងពីឆ្នាំ ២០១៥រហូតមក ពីចំនួន ១៥ម៉ឺនក្បាល មកនៅត្រឹមតិចជាង ៦៥.០០០ក្បាល ។

អ៊ីរ៉ាក់ ត្រូវបានញាំញីផងដែរដោយសារសង្រ្គាមរយៈពេលច្រើនទសវត្សរ៍ ចាប់ពីជម្លោះជាមួយអ៊ីរ៉ង់ក្នុងទសវត្សរ៍ឆ្នាំ ១៩៨០ រហូតដល់សង្រ្គាមឈូងសមុទ្រ ២លើក និងការងើបឡើង និងការដួលរលំទៅវិញរបស់ក្រុមរដ្ឋអ៊ិស្លាម ៕