វិមានក្រឹមឡាំង បាននិយាយកាលពីថ្ងៃពុធ (៣០ មេសា) ថា លោកប្រធានាធិបតីរុស្ស៊ី Vladimir Putin បើកចំហចំពោះសន្តិភាពក្នុងប្រទេសអ៊ុយក្រែន ហើយការងារដ៏មមាញឹកកំពុងបន្តជាមួយសហរដ្ឋអាមេរិក ប៉ុន្តែជម្លោះមានភាពស្មុគស្មាញខ្លាំងណាស់ ដូច្នេះវឌ្ឍនភាពឆាប់រហ័សដែលទីក្រុងវ៉ាស៊ីនតោនចង់បាន គឺពិបាកសម្រេចជាខ្លាំង។

ប្រធានាធិបតីអាមេរិក លោក Donald Trump ដែលនិយាយថាលោកចង់ឱ្យពិភពលោកចងចាំក្នុងនាមជាអ្នកបង្កើតសន្តិភាព បានបញ្ជាក់ម្តងហើយម្តងទៀតថា លោកចង់បញ្ចប់ "ការបង្ហូរឈាម" នៃសង្រ្គាមជាង ៣ឆ្នាំនៅអ៊ុយក្រែនឱ្យបានឆាប់។ ប៉ុន្តែទីក្រុងវ៉ាស៊ីនតោន កំពុងខកចិត្តចំពោះបរាជ័យរបស់ទីក្រុងមូស្គូ និងទីក្រុងគីវ ក្នុងការមិនអាចឈានដល់លក្ខខណ្ឌបញ្ចប់សង្រ្គាមទឹកដីដ៏បង្ហូរឈាមបំផុតនៅអឺរ៉ុប ចាប់តាំងពីសង្គ្រាមលោកលើកទីពីរមក។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានថា "ប្រធានាធិបតីរុស្ស៊ី នៅតែបើកចំហចំពោះវិធីសាស្រ្តនយោបាយ និងការទូតក្នុងការដោះស្រាយជម្លោះនេះ” ប៉ុន្តែកិច្ចព្រមព្រៀងឆាប់ពេកពិបាកសម្រេចបានណាស់។ លោកបញ្ជាក់ថា លោក Putin បានបង្ហាញឆន្ទៈក្នុងការចរចាផ្ទាល់ជាមួយអ៊ុយក្រែន ប៉ុន្តែនៅមិនទាន់មានចម្លើយពីក្រុងគីវនៅឡើយ។

បន្ទាប់ពីការលើកឡើងរបស់វិមានក្រឹមឡាំង រដ្ឋមន្ត្រីការបរទេសអ៊ុយក្រែន លោក Andrii Sybiha បាននិយាយថា អ៊ុយក្រែនត្រៀមខ្លួនរួចជាស្រេចសម្រាប់កិច្ចចរចាសន្តិភាពក្នុងទម្រង់ណាមួយ ប្រសិនបើទីក្រុងមូស្គូ ចុះហត្ថលេខាលើបទឈប់បាញ់ដោយគ្មានលក្ខខណ្ឌ៕