លោកប្រធានាធិបតីអាមេរិក Donald Trump កាលពីថ្ងៃពុធ (៣០ មេសា) បានលើកអំពីភាពអត់ធ្មត់ ទម្លាក់កំហុស និងអះអាងពីជ័យជម្នះ ក្នុងការប្រឈមមុខនឹងសេដ្ឋកិច្ចធ្លាក់ចុះនៅត្រីមាសទី១ និងពន្ធ ដែលបានទម្លាក់ប្រជាប្រិយភាពរបស់លោក ដោយនិយាយថា ការងើបឡើងវិញគឺជិតមកដល់ហើយ ប៉ុន្តែទិន្នន័យសេដ្ឋកិច្ចដ៏ទន់ខ្សោយបែបនេះ ធ្វើឱ្យមេដឹកនាំរូបនេះពិបាកបកស្រាយ។

ទិន្នន័យផលិតផលក្នុងស្រុកសរុប GDP មុនកំណត់របស់ក្រសួងពាណិជ្ជកម្មអាមេរិក កាលពីថ្ងៃពុធ បានចង្អុលបង្ហាញពីការធ្លាក់ចុះប្រចាំឆ្នាំ ០,៣% នៅត្រីមាសទី១ ក្នុងពេលបីឆ្នាំ ដោយសារអាជីវកម្មបានសម្រុកនាំចូលទំនិញច្រើនពេក ដើម្បីបញ្ចៀសការចំណាយខ្ពស់ពីពន្ធដែលមិនទាន់សម្រេចរបស់លោក Trump។ សេដ្ឋវិទូមួយចំនួនចង្អុលបង្ហាញពីការចំណាយរបស់អ្នកប្រើប្រាស់ដ៏រឹងមាំ និងការវិនិយោគឯកជន ដែលជាសញ្ញាបង្ហាញថា កំណើនអាចងើបវិញក្នុងពេលឆាប់ៗ។

លោក Trump និងមន្រ្តីជំនិតរបស់លោក ជួបការលំបាកដើម្បីពន្យល់សាធារណៈជនអំពីទិន្នន័យ GDP ដែលដាំក្បាលចុះ ក្រោយកាន់តំណែងបាន ១០០ថ្ងៃនេះ ក្នុងពេលដែលលោកចង់បញ្ជាក់ថា តួលេខមិនល្អនោះដោយសារតែគោលនយោបាយពីមុនរបស់រដ្ឋបាលលោក Joe Biden ប៉ុន្តែក៏អាចល្អបន្តិចវិញដោយសារតែកិច្ចខិតខំប្រឹងប្រែងរបស់លោក Trump។

ថ្លែងទៅកាន់អ្នកយកព័ត៌មាន លោក Trump បានបង្វែរកំហុសថា "គ្រប់គ្នាប្រហែលជាបានឃើញតួលេខមួយចំនួននៅថ្ងៃនេះ ហើយនោះដោយសារតែលោក Biden" ប៉ុន្តែមិនបញ្ជាក់លម្អិតឡើយ។

សេដ្ឋវិទូរំពឹងថា សេដ្ឋកិច្ចនឹងស្ទុះងើបវិញនៅត្រីមាសទី២ ដោយសារការអូសទាញពីការនាំចូលថយចុះ ប៉ុន្តែប្រហែលជាមិនគ្រប់គ្រាន់ដើម្បីបញ្ចៀសវិបត្តិសេដ្ឋកិច្ចទេ ឬរយៈពេលយូរនៃកំណើនដ៏ទាប និងអតិផរណាខ្ពស់ ដែលជាទូទៅគេហៅថា ភាពជាប់គាំងនៃសេដ្ឋកិច្ច៕