ក្រសួងអប់រំ យុវជន និងកីឡា បានរកឃើញសិស្សជ័យលាភីចំនួន ៣០រូប ជាសិស្សពូកែថ្នាក់ជាតិឆ្នាំ ២០២៥នេះ។ សិស្សពូកែថ្នាក់ទី ៩មានចំនួន ១៥នាក់ សិស្សពូកែថ្នាក់ទី ១២មានចំនួន ១៥នាក់។ ក្រសួងអប់រំ បញ្ជាក់ឱ្យដឹងដែរថា ការក្លាយជាជ័យលាភីសិស្សពូកែថ្នាក់ជាតិ គឺជាការទទួលបានឱកាសជាច្រើន ចាប់រាប់ពីការទទួលបានអាហារូបករណ៍ ក៏ដូចជាការចេញទៅប្រកួតប្រជែងនៅក្រៅប្រទេស។

ក្រសួងអប់រំ យុវជន និងកីឡា បានប្រកាសជ័យលាភីសិស្សពូកែថ្នាក់ជាតិលើមុខវិជ្ជា អក្សរសីល្ប៍ខ្មែរ រូបវិទ្យា និងគណិតវិទ្យា សម្រាប់ឆ្នាំសិក្សា ២០២៤-២០២៥។ សិស្សជ័យលាភីដែលជាប់ជាសិស្សពូកែថ្នាក់ជាតិច្រើនជាងគេ គឺសិស្សមកពីរាជធានីភ្នំពេញ បន្ទាប់ដោយសិស្សនៃខេត្តកណ្ដាល។ 

សម្រាប់សិស្សពូកែជ័យលាភីថ្នាក់ជាតិ នៅថ្ងៃប្រកាសលទ្ធផលនេះទទួលបាននូវប្រាក់រង្វាន់ មេដាយពីក្រសួងអប់រំ ក៏ដូចជាការឧបត្ថម្ភមួយចំនួនទៀតពីវិស័យឯកជន។ លើសពីនេះ គឺឱកាសនាពេលខាងមុខ ដែលអាចទទួលបានការបណ្ដុះបណ្ដាលថែម និងចេញទៅប្រកួតប្រជែងគណិតវិទ្យា និងរូបវិទ្យាជាលក្ខណៈអន្តរជាតិជាមួយសិស្សពូកែមកពីបណ្ដាប្រទេសផ្សេងៗ។ នេះជាការលើកឡើងបន្ថែម របស់ លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា។

ការប្រកួតប្រជែងជាលក្ខណៈអន្តរជាតិនេះ ពិតណាស់ជាក្ដីប្រាថ្នារបស់សិស្សពូកែគ្រប់រូប។ ក្រោយជាប់ជាសិស្សពូកែថ្នាក់ជាតិ ពួកគេម្នាក់ៗមានការប្ដេជ្ញាចិត្តខ្ពស់ បន្តការប្រឹងប្រែងសិក្សា ស្រាវជ្រាវ ដើម្បីបន្តចូលរួមការប្រឡងនានាទាំងក្នុងស្រុក និងអន្តរជាតិ។

ការប្រឡងសិស្សពូកែថ្នាក់ជាតិ ជាការប្រឡងធំមួយសម្រាប់សម្រាប់សិស្សថ្នាក់ទី ៩ និងសិស្សថ្នាក់ទី ១២ទូទាំងប្រទេស។ បេក្ខជនគ្រប់ដែលចូលរួមប្រកួតវគ្គចុងក្រោយនេះ សុទ្ធតែជាសិស្សពូកែ ដោយពួកគេម្នាក់ៗ បានឆ្លងកាត់ការប្រកួតប្រជែងជាច្រើនដង ចាប់រាប់ពីការប្រកួតក្នុងសាលា ការប្រកួតថ្នាក់រាជធានី-ខេត្ត ទើបអាចឈានការដល់ការប្រកួតចុងក្រោយនៅរាជធានីភ្នំពេញនេះ៕ អត្ថបទ៖គឹមហុក