ប្រទេសចិន បានលើកឡើងម្ដងទៀតនូវការយល់ឃើញរបស់ខ្លួន ដែលថាជំងឺរាតត្បាតកូវីដ១៩ ដ៏កាចសាហាវ អាចមានប្រភពមកពីសហរដ្ឋអាមេរិក នៅក្នុង "ឯកសារស" ស្តីពីការឆ្លើយតបនឹងជំងឺរាតត្បាត ដែលចេញផ្សាយនៅថ្ងៃពុធ ៣០ មេសា បន្ទាប់ពីរដ្ឋបាលរបស់លោកប្រធានាធិបតីអាមេរិក Donald Trump បានស្តីបន្ទោសថា ជំងឺនេះមកពីការលេចធ្លាយពីមន្ទីរពិសោធន៍នៅចិន។

សេតវិមាន បានបើកគេហទំព័រកូវីដ១៩ មួយនៅថ្ងៃទី១៨ ខែមេសា ដែលក្នុងនោះខ្លួននិយាយថា មេរោគនេះកើតចេញពីការលេចធ្លាយមន្ទីរពិសោធន៍ក្នុងប្រទេសចិន ខណៈរិះគន់លោកអតីតប្រធានាធិបតី Joe Biden អតីតមន្ត្រីសុខាភិបាលជាន់ខ្ពស់របស់អាមេរិក និងអង្គការសុខភាពពិភពលោក (WHO)។

នៅក្នុងឯកសារស ដែលចេញផ្សាយដោយទីភ្នាក់ងារសារព័ត៌មានស៊ីនហួនោះ ទីក្រុងប៉េកាំង បានចោទអាមេរិក ថាធ្វើនយោបាយលើបញ្ហានៃប្រភពដើមកូវីដ១៩ ដោយលើកពីបណ្តឹងនៅរដ្ឋ Missouri ដែលបានធ្វើឱ្យមានការកាត់សេចក្តីប្រឆាំងនឹងចិន ចំនួន ២៤ពាន់លានដុល្លារអាមេរិក សម្រាប់ការស្តុកទុកឧបករណ៍វេជ្ជសាស្ត្រការពារច្រើនហួសហេតុ និងបិទបាំងការផ្ទុះឡើងនៃមេរោគ។

ឯកសារសរបស់ចិន និយាយថា ទីក្រុងប៉េកាំងបានចែករំលែកព័ត៌មានពាក់ព័ន្ធជាមួយ WHO និងសហគមន៍អន្តរជាតិក្នុងលក្ខណៈទាន់ពេលវេលា ដោយសង្កត់ធ្ងន់ថា ការសិក្សារួមគ្នាដោយ WHO និងចិន បានសន្និដ្ឋានថា ការលេចធ្លាយមន្ទីរពិសោធន៍គឺ "មិនទំនងទាល់តែសោះ"។ របាយការណ៍បន្តថា "មានភស្តុតាងជាច្រើនបង្ហាញថា កូវីដ១៩អាចនឹងលេចឡើងក្នុងអាមេរិកលឿនជាងពេលវេលាផ្លូវការដែលខ្លួនបានអះអាង ហើយអាចកើតមានមុនការផ្ទុះឡើងនៅចិនទៅទៀត"៕