​ស្នូកឃ័រ៖ ​កីឡាករ​ស្នូកឃ័រ Jimmy Robertson បាន​បំបែក​កំណត់ត្រា​កីឡាករ​ដែល​រកបាន​ច្រើន​ពិន្ទុ​បំផុត​ក្នុង ១​ហ្វ្រេ​ម​អំឡុង​ការប្រកួតដែល​យកឈ្នះ​កីឡាករ Lee Walker នៅ​ព្រឹត្តិការណ៍​ស្នូកឃ័រ​ជើងឯក Scottish Open​។ ​​កីឡាករ​អង់គ្លេស​រូបនេះ​បាន​យកឈ្នះ​ការប្រកួត​នេះ​ដោយ​លទ្ធផល ៤-១ ខណៈ​ហ្វ្រេ​ម​ដែល​រកបាន​ពិន្ទុ​ច្រើនជាងគេ​នោះ​គឺ​នៅ​ហ្វ្រេ​ម​ទី៥ ចុងក្រោយ​គេ​តែម្តង​ដែល​រកបាន​ដល់​ទៅ ១៧៨ពិន្ទុ​។

​​១៧៨ពិន្ទុ​បានមក​ការ​វាយ​បាន ១៣៤ពិន្ទុ ​និង​បូក​ទាំង​កំហុស​របស់ Lee Walkers ៤៤ពិន្ទុ​។ ​​កំណត់ត្រា​កីឡាករ​ដែល​រកបាន​មួយ​ហ្វ្រេ​ម​ច្រើន​ពិន្ទុ​ជាងគេ​គឺ Dominic Dale តាំងពី​ឆ្នាំ១៩៩៩ នៅ​ព្រឹត្តិការណ៍ជើងឯក​ពិភពលោក​ដែល​រកបាន​ត្រឹម ១៦៧ពិន្ទុ​។ ​​ងាក​មក​លទ្ធផល​គូប្រកួត​ផ្សេងទៀត​នៅ Scottish Open នេះ​វិញ​អតីត​ជើងឯក​ពីរ​សម័យ Ronnie O’Sullivan បាន​ឈានចូល​ជុំ​បន្ត​ផងដែរ​ក្រោយ​យកឈ្នះ​មកពី​កោះ​ស៊ី​ប Michael Georgiou ៤-០ហ្វ្រេ​ម​។ ​​អ្នកការពារ​ជើងឯក និង​ជា​កីឡា​ករលេខ ១ ពិភពលោក Mark Selby បាន​យកឈ្នះ​កីឡាករ Oliver Lines ៤-១ហ្វ្រេ​ម​ស្របពេល​ជើងឯក​រង UK Championship ថ្មី​កីឡាករ​ប៊ែ​ល​ហ្ស៊ិ​ក Luca Brecel យកឈ្នះ Joe Perry ៤-២ហ្វ្រេ​ម​។ ​​ចំណែកឯ​កីឡាករ​ស្កុ​ត​ឡេ​ន Anthony McGill នឹងត្រូវ​ជួប​ជាមួយ​កីឡាករ​អូស្ត្រាលី Neil Robertson ក្រោយ​យកឈ្នះ Chris Wakelin ៤-១ហ្វ្រេ​ម ខណៈ​មិត្ត​រួម​ជាតិ​ស្កុ​ត​ឡេ​ន Stephen Maguire យកឈ្នះ​កីឡាករ​ថៃ Sunny Akani ៤-១ហ្វ្រេ​ម​ផងដែរ​៕

​អត្ថបទ​៖​នាង សុភា​វុ​ធ