អ៊ីស្រាអែលបានវាយប្រហារសាធារណរដ្ឋអារ៉ាប់ស៊ីរី កាលពីថ្ងៃពុធ ជាអ្វីដែលខ្លួនហៅថា ជា«ការព្រមាន» ប្រឆាំងនឹងការវាយប្រហារលើជនជាតិភាគតិច Druze ក្នុងអន្តរាគមន៍យោធា ដែលបានកើតឡើង ខណៈការប៉ះទង្គិចដោយសារការប្រកាន់និកាយ បានរាលដាល នៅជិតក្រុងដាម៉ាស។

អំពើហិង្សាបង្កឡើងដោយក្រុមប្រកាន់និកាយ និងអន្តរាគមន៍របស់អ៊ីស្រាអែល បង្ហាញពីបញ្ហាប្រឈមដ៏ធំចំពោះអាជ្ញាធររដ្ឋឥស្លាម ដែលបានផ្តួលរំលំមេដឹកនាំកាន់អំណាចដ៏យូរលោក បាសា អាល់អា          សាដ (Bashar al-Assad) ក្នុងខែធ្នូ និងបានកើតឡើងបន្ទាប់ពីការសម្លាប់រង្គាលកាលពីខែមុន នៅតំបន់ឆ្នេរអាឡាវីត (Alawite)របស់ប្រទេសស៊ីរី។

លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា អ៊ីស្រាអែល «បានធ្វើសកម្មភាពព្រមានមួយ និងវាយប្រហារអង្គការនៃក្រុមជ្រុលនិយមដែលរៀបចំ ដើម្បីវាយប្រហារជនជាតិភាគតិច Druze» នៅក្នុងទីក្រុង Sahnaya។

ការប៉ះទង្គិចគ្នាដោយសារការប្រកាន់និកាយដែលបានបណ្តាលឲ្យមនុស្សស្លាប់យ៉ាងច្រើន បានផ្ទុះឡើងនៅពេលយប់ នៅក្នុងទីក្រុង Sahnaya ជាទីក្រុងដែលមានជនជាតិភាគតិច Druze និងជនជាតិភាគតិចកាន់គ្រិស្តសាសនារបស់ប្រទេសស៊ីរី រស់នៅ។ 

នាពេលកន្លងទៅ អ៊ីស្រាអែលធ្លាប់បានព្រមានក្រុមមេដឹកនាំឥស្លាមនិយមស៊ីរី ប្រឆាំងនឹងការធ្វើបាបជនជាតិភាគតិច Druze ដែលប្រតិបត្តិតាមសាសនាឥស្លាម និងបង្កើតបានប្រហែលបីភាគរយនៃចំនួនប្រជាជនស៊ីរី។