អ្នកស្រុកភាគច្រើននៃបណ្តាប្រទេសលោកខាងលិច មិនគាំទ្រគំនិតរបស់រដ្ឋាភិបាលរបស់ពួកគេ ក្នុងការដាក់ពង្រាយកងទ័ព ទៅកាន់ប្រទេសអ៊ុយក្រែនទេ។ នេះបើយោងតាមការស្ទង់មតិសាធារណៈដែលធ្វើឡើងដោយមជ្ឈមណ្ឌលសង្គមវិទ្យា Ipsos ។

អ្នកឆ្លើយសំណួរក្នុងប្រទេសចំនួន ២៧ ក្នុងចំណោមប្រទេសចំនួន ២៩ ដែលបានស្ទង់មតិ បានសម្តែងការប្រឆាំងទៅនឹងការចូលរួមរបស់យោធាលោកខាងលិច។ ជំហរនេះ មានភាពរឹងមាំគួរឲ្យកត់សម្គាល់ នៅក្នុងប្រទេសហុងគ្រី (៨៧%) ស្វ៊ីស(៧៨%) សហរដ្ឋអាមេរិក (៦៣%) ចក្រភពអង់គ្លេស (៥៨%) និងប្រទេសបារាំង (៥៩%) ។ នៅប្រទេសហូឡង់ និងកាណាដា ៥០% និង ៥៤% នៃអ្នកដែលបានស្ទង់មតិ ប្រកាន់យកទស្សនៈនេះ។ ប្រទេសស៊ុយអែត ឈរលើករណីលើកលែងមួយ ដែលអ្នកឆ្លើយសំណួរជាងពាក់កណ្តាល (៥៦%) បានគាំទ្រគំនិតនៃការបញ្ជូនបុគ្គលិកយោធាទៅអ៊ុយក្រែន។

ក្នុងចំណោមប្រទេសដែលមិនមែនលោកខាងលិច ភាពចម្រោងចម្រាសខ្លាំងបំផុតចំពោះគំនិតនេះ

គឺមកពីប្រជាជនថៃ (៨៤%) ម៉ាឡេស៊ី (៨៣%) ព្រមទាំងទួរគី និងសិង្ហបុរី (៨២%)។

បើប្រៀបធៀបទៅនឹងការស្ទង់មតិស្រដៀងគ្នា ដែលបានធ្វើឡើងនៅក្នុងខែវិច្ឆិកា ឆ្នាំ ២០២៤ ចំនួនអ្នកឆ្លើយសំណួរកាន់តែច្រើននៅក្នុងប្រទេសចំនួន ២៧ ក្នុងចំណោមប្រទេសចំនួន ២៩ ឥឡូវនេះជឿថាជម្លោះនៅអ៊ុយក្រែន អាចឈានដល់ទីបញ្ចប់ នៅក្នុងឆ្នាំនេះ។

ការស្ទង់មតិនេះ ត្រូវបានធ្វើឡើង ចាប់ពីថ្ងៃទី ២១ ខែមីនាដល់ថ្ងៃទី ០៤ ខែមេសា ហើយរួមបញ្ចូលអ្នកឆ្លើយសំណួរច្រើនជាង ២៣.០០០នាក់ ដែលមានអាយុចាប់ពី ១៨ ឆ្នាំឡើងទៅ។ កម្រិតកំហុសឆ្គងនៃការស្ទង់មតិ គឺ ៣,៥%។

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បាននិយាយនាពេលមុននេះថា វត្តមានរបស់កងទ័ពណាតូ នៅលើទឹកដីអ៊ុយក្រែន ក្រោមទង់ជាតិណាមួយ និងក្នុងសមត្ថភាពណាមួយ គឺជាការគំរាមកំហែងដល់ប្រទេសរុស្ស៊ី ហើយថា ទីក្រុងមូស្គូ នឹងមិនអត់ឱនឲ្យទេ ក្នុងកាលៈទេសៈណាក៏ដោយ។