​ដា​ណឺ​ម៉ាក​៖ ក្រុម​មន្ត្រី​សុខភាព​ដា​ណឺ​ម៉ាក​បាន​និយាយ​នៅ​ថ្ងៃ​នេះ​ថា វីរុស COVID-19 ប​ម្លែ​ង​ខ្លួន​ថ្មី Omicron (B.1.1.529) កំពុង​ឆ្លង​រាល​ដាល​ទូទាំង​ប្រទេស ក្រោយ​ការ​បើក​ឲ្យ​មានការ​ធ្វើដំណើរ​ចូល​ពី​ចក្រភព​អង់គ្លេស ដែល​វីរុស​ប​ម្លែ​ង​ខ្លួន​ថ្មី​នេះ​កំពុង​ឆ្លង​រាលដាល​នៅ​តំបន់​ផ្សេងៗ ​នៃ​ចក្រភព​អង់គ្លេស​។

​យោង​តាម​សារព័ត៌មាន Reuters មន្ត្រី​ជាន់​ខ្ពស់​មួយ​រូប​របស់​​ដា​ណឺ​ម៉ាក​បាន​និយាយ​ថា វីរុសប​ម្លែ​ង​ខ្លួន​ថ្មី Omicron កំពុង​ឆ្លង​រាលដាលយ៉ាងសកម្ម​នៅ​ក្នុង​សហគមន៍ ពិសេស​នៅ​ភាគ​ខាងកើត និង​ខាងលិច។ ​ប្រទេស​នេះ​បាន​រាយការណ៍​ករណី​ឆ្លង​វីរុស​ប​ម្លែ​ង​ខ្លួន​ថ្មី​នេះ​ចំនួន ៣៩៨​នាក់​។ កាលពីដើម​សប្ដាហ៍​នេះ ប្រទេស​បារាំង​បាន​រក​ឃើញ​ករណី​វិជ្ជមានវីរុស COVID-19 ប​ម្លែ​ង​ខ្លួន​ថ្មី Omicron​ ចំនួន​ ២៥​ករណី​ក្នុង​នោះ​មាន​ករណី​ឆ្លង​នាំចូល​ចំនួន ២១ករណីពី​ប្រទេស​អាហ្វ្រិក​ខាងត្បូង និង​ ៤​ករណី​ផ្សេងទៀត​នៅ​ក្នុង​សហគមន៍​។ ​នាយករដ្ឋមន្ត្រី​បារាំង​និយាយ​ថា ប្រទេស​នេះ​នឹង​មិន​ចាំបាច់​មាន​វិធាន​ការ​បិទ​ខ្ទប់​ទៀត​ទេ ដោយ​អំពាវនាវ​ឲ្យ​ពលរដ្ឋ​បញ្ឈប់​ការ​ជួប​ជុំ ពាក់​ម៉ាស់​ជា​ចាំបាច់​សម្រាប់​សាលារៀន និង​បិទ​ក្លឹប​កម្សាន្ត​៤​សប្ដាហ៍​។​

​ខណៈ​ប្រទេស​មួយ​ចំនួន​នៅ​ទូទាំង​ពិភពលោក​ដែល​មាន​ការ​ឆ្លង​ខ្លាំង នៅតែ​បន្ត​ប្រយុទ្ធ​ប្រឆាំង​នឹង​វីរុស​ប​ម្លែ​ង​ខ្លួន​ថ្មី​ប្រភេទ Delta (B1617.2) ប្រទេស​ខ្លះ​នៅ​តំបន់​អឺរ៉ុប​កំពុង​ចាត់វិធានការ​ថ្មីៗ ដើម្បី​បញ្ឈប់​ការ​ឆ្លង​រាលដាលក្នុង​ឱកាស​បុណ្យ​ឈប់សម្រាក ​គឺ​បុណ្យ​ណូអែល​។ លោក​នាយក​រដ្ឋមន្ត្រី​អង់គ្លេស Minister Boris Johnson បាន​អនុវត្តន៍​ផែនការ B ដែលជា​វិធានការ​រឹតត្បិត​កាន់តែ​តឹងរ៉ឹងនៅ​ក្នុង​ចក្រភព​អង់គ្លេស ដោយបញ្ជា​ឲ្យ​ប្រជាពលរដ្ឋ​ធ្វើការ​ពី​ផ្ទះ ពាក់​ម៉ាស់​នៅ​តាម​ទីសាធារណៈ និង​ប្រើ​កាត​ចាក់​វ៉ាក់សាំងដើម្បី​បញ្ឈប់​ការ​ឆ្លង​រាលដាល​វីរុស​កូ​រ៉ូ​ណា​ប​ម្លែ​ង​ខ្លួន​ថ្មី Omicron​។ ក្រូ​អាត​ជា​ប្រទេស​ចុងក្រោយ​នៅ​អឺរ៉ុបដែល​បាន​បញ្ជាក់​ថា ​មាន​ករណី​ឆ្លង​វីរុស​ប​ម្លែ​ង​ខ្លួន​ថ្មី Omicron៕

អត្ថបទ៖ សុខមាន