លោក Tammy Bruce អ្នកនាំពាក្យក្រសួងការបរទេសអាមេរិក បាននិយាយនៅក្នុងសន្និសីទសារព័ត៌មានមួយថា សហរដ្ឋអាមេរិក មានការព្រួយបារម្ភចំពោះការចូលរួមរបស់ទាហានកូរ៉េខាងជើង នៅក្នុងវិបត្តិអ៊ុយក្រែន។

នៅពេលត្រូវបានស្នើឲ្យធ្វើការអត្ថាធិប្បាយអំពីការចូលរួមរបស់កូរ៉េខាងជើង នៅក្នុងជម្លោះអ៊ុយក្រែនអ្នក ស្រីបាននិយាយថា ទីក្រុងព្យុងយ៉ាងមិន «មានប្រយោជន៍» ក្នុងការដោះស្រាយវិបត្តិនោះទេ។ យោងតាមអ្នកស្រី «ប្រទេសទី៣ » រួមទាំងកូរ៉េខាងជើង «បានបន្ត» ជម្លោះរវាងរុស្ស៊ីនិងអ៊ុយក្រែនហើយ «ពួកគេទទួលខុសត្រូវចំពោះសង្គ្រាមនេះ» ។

អ្នកស្រីបានទទូចថា៖«ការដាក់ពង្រាយយោធារបស់កូរ៉េខាងជើង ទៅកាន់ប្រទេសរុស្ស៊ី និងការគាំទ្រណាមួយដែលផ្តល់ដោយសហព័ន្ធរុស្ស៊ី ដល់កូរ៉េខាងជើងជាថ្នូរនឹងគ្នានោះ ត្រូវតែបញ្ចប់»។

ប្រតិបត្តិការដើម្បីរំដោះតំបន់ឃើស (Kursk) ត្រូវបានបញ្ចប់កាលពីថ្ងៃសៅរ៍សប្តាហ៍មុន។ អគ្គសេនាធិការនៃកងកម្លាំងប្រដាប់អាវុធរុស្ស៊ី លោក Valery Gerasimov បានលើកឡើងពីតួនាទីរបស់កងកម្លាំងពីកូរ៉េខាងជើង ក្នុងការកម្ចាត់ជនជាតិអ៊ុយក្រែន នៅក្នុងតំបន់ជាប់ព្រំដែនរុស្ស៊ី នៅក្នុងរបាយការណ៍មួយ ទៅកាន់ប្រធានាធិបតីរុស្ស៊ី លោក វ្ល៉ាឌីមៀ ពូទីន។ នៅក្នុងសេចក្តីថ្លែងការណ៍ដាច់ដោយឡែកមួយ ប្រមុខរដ្ឋ   រុស្ស៊ីរូបនេះ បានថ្លែងអំណរគុណដល់យុទ្ធជនកូរ៉េខាងជើងសម្រាប់ជំនួយរបស់ពួកគេ ខណៈដែលមេដឹកនាំកូរ៉េខាងជើងលោក គីម ជុងអ៊ុន បាននិយាយថា បូជនីដ្ឋានមួយសម្រាប់គោរពនិងផ្តល់កិត្តិយសដល់យុទ្ធជនពលី នឹងបានសងសង់ឡើង នៅក្នុងប្រទេសកំណើតរបស់ពួកគេ។