រយៈពេល ៦ខែបន្ទាប់ពីបានយកឈ្នះលោក Joe Biden ប្រធានាធិបតីអាមេរិក លោក Donald Trump បានកាន់អំណាចវិញ ប៉ុន្តែនៅតែវិលវល់ជាមួយអ្នកកាន់តំណែងមុនរបស់លោក នៅសេតវិមាន ដោយឆ្លៀតគ្រប់ឱកាស ដើម្បីបន្ទោសបុរសដែលនៅតែជាការលងបន្លាចផ្នែកនយោបាយដ៏ធំបំផុតរបស់លោក។

ទីផ្សារភាគហ៊ុនបានបើកជូញដូរជាមួយនឹងការធ្លាក់ចុះយ៉ាងខ្លាំង កាលពីថ្ងៃពុធ (ទី៣០ ខែមេសា) ជាសញ្ញាបង្ហាញពីរលកនៃការព្យាករសេដ្ឋកិច្ចអវិជ្ជមានមួយទៀតដែលជំរុញដោយសង្រ្គាមពន្ធសកលរបស់លោក Trump។ យោងតាមរបាយការណ៍កាលពីថ្ងៃពុធ ពីក្រសួងពាណិជ្ជកម្ម GDP (ផលិតផលក្នុងស្រុកសរុប) បានធ្លាក់ចុះ ០,៣ភាគរយនៅក្នុងត្រីមាសទី១ ឆ្នាំ២០២៥ ដោយនេះជាលើកទី១ ហើយ ដែលសេដ្ឋកិច្ចបានធ្លាក់ចុះ ចាប់តាំងពីឆ្នាំ២០២២។ ទន្ទឹមនឹងនេះដែរ សូចនាករអតិផរណាកំពុងកើនឡើងយ៉ាងលឿន ហើយកំណើនប្រាក់ឈ្នួលកំពុងថយចុះ។

ប៉ុន្មានម៉ោងក្រោយមក ក្នុងអំឡុងពេលកិច្ចប្រជុំគណៈរដ្ឋមន្ត្រី លោកបានបដិសេធថា មិនមានការទាក់ទងគ្នានោះឡើយ រវាងការធ្លាក់ចុះសេដ្ឋកិច្ច និងគោលនយោបាយពាណិជ្ជកម្មគាំពារនិយមរបស់លោក បើទោះបីជាវាគឺជាកត្តាសំខាន់ដែលនាំឲ្យការនាំចូលកើនឡើង ដោយសារតែក្ដីបារម្ភ អំពីអត្រាពន្ធដ៏ទូលំទូលាយរបស់មេដឹកនាំទៅពីគណបក្សសាធារណរដ្ឋក៏ដោយ។ លោកបាននិយាយអំពីការធ្លាក់ចុះនៅត្រីមាសទី១ ថា៖ «នេះគឺជាគោលនយោបាយរបស់លោក Biden ហើយអាចនិយាយបានថា ត្រីមាសបន្ទាប់ គឺជាដំណើរផ្លូវរបស់លោក Biden»។

យោងតាមការរាប់ចំនួននាពេលថ្មីៗនេះ ដោយសារព័ត៌មាន The New York Times បានបង្ហាញថា លោកមហាសេដ្ឋីទ្រព្យស្ដុកស្ដម្ភរូបនេះ បាននិយាយអំពីអ្នកកាន់តំណែងមុនរបស់លោកជាមធ្យម ៦ដង ក្នុងមួយថ្ងៃ គិតចាប់តាំងពីឡើងកាន់តំណែងជាផ្លូវការ នៅថ្ងៃទី២០ ខែមករា។ សូម្បីតែអ្នកមានឥទ្ធិពលអភិរក្សនិយម លោក Dave Portnoy ដែលជាបុគ្គលដ៏មានប្រជាប្រិយ សម្រាប់វោហាសាស្ត្រប្រឆាំងលោក Biden ក្នុងអំឡុងយុទ្ធនាការបោះឆ្នោតប្រធានាធិបតីឆ្នាំ២០២៤ ក៏ធុញទ្រាន់នឹងការបន្តរិះគន់នេះដែរ។

លោក Portnoy ដែលបានបង្កើតក្រុមហ៊ុនប្រព័ន្ធផ្សព្វផ្សាយឌីជីថល Barstool Sports បានលើកឡើងថា៖ «ទីផ្សារភាគហ៊ុន គឺជាការឆ្លុះបញ្ចាំងដោយផ្ទាល់នៃរយៈពេល ១០០ថ្ងៃដំបូងរបស់លោក Trumps នៅក្នុងការកាន់តំណែង។ មិនមែនមានន័យថា វានឹងមិនប្រសើរឡើងនោះទេ ប៉ុន្តែនេះគឺជាទីផ្សាររបស់គាត់ មិនមែនជារបស់លោក Biden នោះទេ»។

ប៉ុន្តែយ៉ាងណាក្ដី លោក Trump ដែលប្រជាប្រិយភាពរបស់លោក បានធ្លាក់ចុះក្នុងរយៈពេលប៉ុន្មានសប្តាហ៍ថ្មីៗនេះ នៅតែទម្លាក់កំហុសទៅលើលោក Biden ឥតឈប់ឈរ៕