ការពិភាក្សា រវាងទីក្រុងប៊្រុចសែល និងទីក្រុងឡុងដ៍ សម្រាប់ភាពជាដៃគូផ្នែកសន្តិសុខ និងការពារជាតិកំពុងបន្តជាមួយឯកអគ្គរដ្ឋទូតសហភាពអឺរ៉ុប (EU) ដែលគ្រោងនឹងពិភាក្សាលើសេចក្តីព្រាងដំបូងដែលដាក់រួមគ្នា ដោយសេវាសកម្មភាពខាងក្រៅរបស់គណៈកម្មការ នៅសប្តាហ៍ក្រោយ។

កាលពីថ្ងៃពុធ (ទី៣០ ខែមេសា) ប្រភពជាច្រើនបានប្រាប់សារព័ត៌មាន Euronews ថា បណ្តាប្រទេសជាសមាជិកសហភាពអឺរ៉ុប កំពុងសង្ឃឹមថា ការចរចាលើកិច្ចព្រមព្រៀងសន្តិសុខជាមួយចក្រភពអង់គ្លេស (UK) នឹងបន្តដំណើរការទៅមុខ ដូច្នេះវាអាចជាសមិទ្ធផលដ៏ធំ នៅពេលមេដឹកនាំជួបជុំគ្នា សម្រាប់កិច្ចប្រជុំកំពូល នៅថ្ងៃទី១៩ ខែឧសភា។

ការឈានដល់កតិកាសញ្ញាសន្តិសុខ នឹងអនុញ្ញាតចក្រភពអង់គ្លេសចូលរួមក្នុងលទ្ធកម្មរួមគ្នា សម្រាប់សមត្ថភាពយោធាជាមួយរដ្ឋជាសមាជិកសហភាពអឺរ៉ុប ហើយអាចឲ្យប្រទេសនៃប្លុកនេះទទួលបានគ្រឿងយុទ្ធោបករណ៍ដែលផលិតដោយអង់គ្លេសតាមរយៈឧបករណ៍ថ្មីរបស់អឺរ៉ុបចំនួន ១៥០ពាន់លានអឺរ៉ូ ដើម្បីបង្កើនការចំណាយលើវិស័យការពារជាតិ។

បន្ទាប់ពីមានកិច្ចប្រជុំទៀងទាត់របស់ឯកអគ្គរដ្ឋទូតសហភាពអឺរ៉ុប កាលពីថ្ងៃពុធ ជាថ្ងៃដែលកិច្ចប្រជុំកំពូលនាពេលខាងមុខត្រូវបានពិភាក្សានោះ ដោយនិយាយក្នុងលក្ខខណ្ឌមិនបញ្ចេញឈ្មោះ អ្នកការទូតសហភាពអឺរ៉ុប បានប្រាប់សារព័ត៌មាន Euronews ថា៖ «យើងទាំងអស់គ្នាសង្ឃឹមថា ភាពជាដៃគូសន្តិសុខ និងការពារជាតិ អាចត្រូវបានចុះហត្ថលេខា»៕