សេវាសង្គ្រោះបន្ទាន់ បាននិយាយថា យានដ្រូនរបស់រុស្ស៊ី បានវាយប្រហារទីក្រុងកំពង់ផែ Odesa នៃ សមុទ្រខ្មៅរបស់ប្រទេសអ៊ុយក្រែន នៅព្រឹកថ្ងៃព្រហស្បតិ៍នេះ ដោយបានបណ្តាលឲ្យមនុស្ស ២នាក់ស្លាប់ និង ១៥នាក់ រងរបួស រួមទាំងបង្កឲ្យអគ្គិភ័យឆាបឆេះ និងបំផ្លាញហេដ្ឋារចនាសម្ព័ន្ធ។  

អភិបាលតំបន់ Oleh Kiper បានសរសេរនៅលើកម្មវិធីផ្ញើសារ Telegram ថា៖«ការវាយប្រហាររបស់សត្រូវ បានបំផ្លាញអគារខ្ពស់ៗ ផ្ទះឯកជន ផ្សារទំនើប សាលារៀន និងរថយន្ត»។ «ភ្លើងបានឆាបឆេះនៅកន្លែងខ្លះ ហើយកំពុងត្រូវបានពន្លត់ដោយក្រុមអ្នកជួយសង្គ្រោះរបស់យើង»។

ស្ថានីយរថភ្លើង Ukrzaliznytsia គ្រប់គ្រងដោយរដ្ឋរបស់ប្រទេសអ៊ុយក្រែន បានឲ្យដឹងថា ការវាយប្រហារពេញមួយយប់ ក៏បានធ្វើឲ្យខូចផ្លូវរថភ្លើង បណ្តាញទំនាក់ទំនង និងរថយន្តដឹកទំនិញចំនួន បីគ្រឿង ផង  ដែរ។

បុគ្គលិកផ្លូវដែក កំពុងអនុវត្តការងារជួសជុលយ៉ាងឆាប់រហ័ស ដើម្បីធានាថា រថភ្លើងដឹកទំនិញរត់ទៅកាន់កំពង់ផែដោយគ្មានការរំខាន។ ពួកគេកំពុងដំណើការតាមផ្លូវជំនួសមួយ។

ស្ថានីយរថភ្លើងនេះ បានបន្ថែមលើបណ្តាញ Telegramថា រថភ្លើងដឹកអ្នកដំណើរ កំពុងដំណើរការតាមកាលវិភាគ។ យោងតាមក្រុមហ៊ុនបានឲ្យដឹងថា មនុស្សម្នាក់ក្នុងចំណោមមនុស្សដែលត្រូវបានសម្លាប់ នៅក្នុងផ្ទះរបស់ខ្លួន ក្នុងអំឡុងពេលការវាយប្រហារលើទីក្រុងកំពងផែ Odesa គឺជាកម្មករផ្លូវដែក។