អ៊ុយក្រែន និងសហរដ្ឋអាមេរិក បានចុះហត្ថលេខាលើកិច្ចព្រមព្រៀងរ៉ែដែលលោកប្រធានាធិបតី Donald Trump និយាយថា វានឹងផ្តល់ការលើកទឹកចិត្តផ្នែកសេដ្ឋកិច្ចសម្រាប់សហរដ្ឋអាមេរិកក្នុងការបន្តវិនិយោគលើវិស័យការពារជាតិអ៊ុយក្រែន និងការកសាងឡើងវិញបន្ទាប់ពីលោកសម្របសម្រួលការចរចាកិច្ចព្រមព្រៀងសន្តិភាពជាមួយរុស្ស៊ី ។ 

 អ្នកស្រី Oksana Sirenko វ័យ ៤២ឆ្នាំ គឺជាពលរដ្ឋមួយរូបរស់នៅក្នុងទីក្រុងគីវ និយាយថា ដើម្បីបញ្ចប់សង្រ្គាម ពួកយើងត្រូវតែលះបង់អ្វីមួយ ។ ពួកយើងត្រូវតែលះបង់ជីវិតមនុស្ស និងលះបង់ធនធានអ៊ុយក្រែន ។

កិច្ចព្រមព្រៀងរ៉ែដែលជាប្រធានបទដ៏សំខាន់នៃការចរចាដ៏តានតឹងអស់រយៈពេលជាច្រើនខែ ហើយស្ទើរតែបានខកខាន មុនពេលចុះហត្ថលេខានៅទីក្រុងវ៉ាស៊ីនតោននេះ នឹងបង្កើតមូលនិធិវិនិយោគកសាងឡើងវិញរវាងសហរដ្ឋអាមេរិក និងអ៊ុយក្រែន ដែលរដ្ឋបាលលោក Trump និយាយថា វានឹងចាប់ផ្តើមសងជំនួយប្រមាណ ១៧៥ ពាន់លានដុល្លារដែលអាមេរិកផ្តល់ជូនអ៊ុយក្រែន ចាប់តាំងពីសង្រ្គាមផ្ទុះឡើង ។ 

ចំណែកឯអ្នកស្រី Vita Fediuk គឺជាពលរដ្ឋមួយរូបទៀតរស់នៅក្នុងទីក្រុងគីវ និយាយប្រាប់ទីភ្នាក់ងារព័ត៌មានរ៉យទ័រថា តាមរយៈការចុះហត្ថលេខាលើកិច្ចព្រមព្រៀងនេះ សហរដ្ឋអាមេរិកមានកាតព្វកិច្ចដ៏សំខាន់មួយក្នុងការស្តាអ៊ុយក្រែនឡើងវិញ យ៉ាងយោចណាស់ វាជាការធានាសន្តិសុខមួយជូនដល់ទីក្រុងគីវ ។

រដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent និយាយនៅក្នុងសេចក្តីថ្លែងការណ៍មួយថា កិច្ចព្រមព្រៀងនេះបង្ហាញយ៉ាងច្បាស់ពីការប្តេជ្ញាចិត្តរបស់រដ្ឋបាលលោក Trump ចំពោះដំណើរការសន្តិភាពប្រកបដោយសេរី អធិបតេយ្យភាព និងវិបុលភាពក្នុងរយៈពេលវែងរបស់អ៊ុយក្រែន ។ 

លោក Trump បានស្រមៃមើលភាពជាដៃគូរវាងប្រជាជនអាមេរិក និងប្រជាជនអ៊ុយក្រែន ដើម្បីបង្ហាញពីការប្តេជ្ញាចិត្តរបស់ភាគីទាំងពីរចំពោះសន្តិភាព និងវិបុលភាពយូរអង្វែងក្នុងប្រទេសអ៊ុយក្រែនហើយដើម្បីឲ្យច្បាស់ គ្មានរដ្ឋ ឬបុគ្គលណាដែលផ្តល់ហិរញ្ញប្បទាន ឬផ្គត់ផ្គង់ម៉ាស៊ីនសង្រ្គាមរុស្ស៊ី នឹងត្រូវបានអនុញ្ញាតឱ្យទទួលបានអត្ថប្រយោជន៍ពីការកសាងឡើងវិញសម្រាប់អ៊ុយក្រែននោះទេ ។

លោក Trump បានប្រឹងប្រែងជំរុញឲ្យមានកិច្ចព្រមព្រៀងមួយនេះ ដោយរូបលោកលើកឡើងថា សហរដ្ឋអាមេរិកគួរទទួលបានអ្វីមួយមកវិញសម្រាប់ជំនួយយោធារបស់ពួកគេដល់អ៊ុយក្រែន ៕