ក្រុមមន្រ្តីតែងតាំងដោយរុស្ស៊ីនិយាយថា ការវាយប្រហារយានដ្រូនអ៊ុយក្រែនបណ្តាលឲ្យមនុស្សយ៉ាងហោច ៧នាក់ស្លាប់នៅតំបន់ Kherson កាន់កាប់អន្លើរដោយរុស្ស៊ីនាថ្ងៃព្រហស្បតិ៍នេះ ។

លោក Vladimir Saldo គឺជាអភិបាលតំបន់តែងតាំងដោយរុស្ស៊ី និយាយថា ការវាយប្រហារនៅតំបន់ Kherson ត្រូវចំផ្សារមួយកន្លែងក្នុងទីក្រុង Oleshky ដោយបានសម្លាប់មនុស្ស ៧នាក់ និងមនុស្សជាង ២០នាក់ផ្សេងទៀត រងរបួស ។

លោកបន្តថា នៅវេលាម៉ោង ៩ និង ៣០នាទីព្រឹក ម៉ោងក្នុងស្រុកនៅទីក្រុងម៉ូស្គូ កងកម្លាំងអ៊ុយក្រែន បើកការវាយប្រហារទ្រង់ទ្រាយធំដោយប្រើប្រាស់យានដ្រូន FPV លើគោលដៅជនស៊ីវិល ។

លោក Saldo បាននិយាយនៅលើបណ្តាញព័ត៌មានសង្គម Telegramថា អំឡុងពេលវាយប្រហារ មានមនុស្សច្រើនណាស់នៅក្នុងផ្សារ ។

ខណៈពេលនោះដែរ យានដ្រូនរបស់រុស្ស៊ី បានវាយប្រហារទីក្រុងកំពង់ផែសមុទ្រខ្មៅ Odesa របស់អ៊ុយក្រែន នាព្រឹកថ្ងៃព្រហស្បតិ៍នេះ ដោយបានបណ្តាលឲ្យមនុស្ស ២នាក់ស្លាប់ និង ១៥នាក់ រងរបួស រួមទាំងបង្កឲ្យអគ្គិភ័យឆាបឆេះ និងបំផ្លាញហេដ្ឋារចនាសម្ព័ន្ធ។ 

អភិបាលតំបន់ Oleh Kiper បានសរសេរនៅលើបណ្តាញព័ត៌មានសង្គម Telegram ថា ការវាយប្រហាររបស់សត្រូវ បានបំផ្លាញអគារខ្ពស់ៗ ផ្ទះឯកជន ផ្សារទំនើប សាលារៀន និងរថយន្ត។ ភ្លើងបានឆាបឆេះនៅកន្លែងខ្លះ ហើយកំពុងត្រូវបានពន្លត់ដោយក្រុមអ្នកជួយសង្គ្រោះរបស់យើង ៕