ប្រធានាធិបតីអាមេរិក លោក Donald Trump បានព្រមានច្បាស់ៗថា រាល់ការទិញប្រេង ឬផលិតផលគីមីឥន្ធនៈពីអ៊ីរ៉ង់ ត្រូវតែបញ្ឈប់ ហើយប្រទេសណាមួយ ឬអ្នកទិញណាមួយពីប្រទេសនេះ នឹងត្រូវរងទណ្ឌកម្មជាបន្តបន្ទាប់ភ្លាមៗ។ នៅលើបណ្ដាញសង្គម Truth Social កាលពីថ្ងៃព្រហស្បតិ៍ (០១ ឧសភា) លោក Trump គំរាមថា "អ្នកទិញប្រេងអ៊ីរ៉ង់ នឹងមិនត្រូវអនុញ្ញាតឱ្យធ្វើជំនួញជាមួយអាមេរិក ក្នុងគ្រប់រូបភាព ឬទម្រង់ណាមួយទាំងអស់"។

ការអត្ថាធិប្បាយរបស់លោក Trump ធ្វើឡើងបន្ទាប់ពីការពន្យារពេលនៃកិច្ចចរចាជុំចុងក្រោយបំផុត របស់អាមេរិក ជាមួយអ៊ីរ៉ង់ ជុំវិញកម្មវិធីនុយក្លេអ៊ែររបស់ខ្លួន ដែលគ្រោងធ្វើឡើងនៅទីក្រុងរ៉ូម នៅថ្ងៃសៅរ៍ ០៣ ឧសភា។ ប្រភពពីមន្ត្រីជាន់ខ្ពស់អ៊ីរ៉ង់ និយាយថា កាលបរិច្ឆេទថ្មីនឹងត្រូវបានកំណត់ "អាស្រ័យលើទង្វើរបស់អាមេរិក"។

រដ្ឋបាលរបស់លោក Trump បានដាក់គោលដៅលើទីក្រុងតេអេរ៉ង់ ជាមួយនឹងទណ្ឌកម្មជាបន្តបន្ទាប់លើអង្គភាពនានា រួមទាំងស្ថានីយស្តុកប្រេងឆៅដែលមានមូលដ្ឋាននៅចិន និងក្រុមហ៊ុនចម្រាញ់ប្រេងឯករាជ្យមួយ ដែលខ្លួនចោទប្រកាន់ថាពាក់ព័ន្ធក្នុងការជួញដូរប្រេង និងគីមីឥន្ធនៈខុសច្បាប់។

គួរបញ្ជាក់ថា ទណ្ឌកម្មបន្តបន្ទាប់ គឺជាទណ្ឌកម្មដែលប្រទេសមួយដាក់លើប្រទេសទីពីរ សម្រាប់ការធ្វើពាណិជ្ជកម្មជាមួយប្រទេសទីបី ដោយរារាំងការចូលទៅកាន់ទីផ្សាររបស់ខ្លួន ហើយរឿងនេះជាឧបករណ៍ដ៏មានឥទ្ធិពលពិសេសសម្រាប់សហរដ្ឋអាមេរិក ដោយសារតែទំហំសេដ្ឋកិច្ចដ៏ធំរបស់ខ្លួន៕