ដោយមានភាពតានតឹង រវាងប្រទេសឥណ្ឌា និងប៉ាគីស្ថាន បន្ទាប់ពីក្រុមអ៊ីស្លាមនិយមបានវាយប្រហារសម្លាប់ភ្ញៀវទេសចរ២៦នាក់នៅក្រុង Pahalgam តំបន់កាស្មៀរ អ្នកស្រុកនៅតាមភូមិនៃភាគីទាំងសងខាងតាមបណ្តោយព្រំដែនកំពុងត្រៀមខ្លួនសម្រាប់អ្វីដែលនឹងកើតឡើងនៅពេលបន្ទាប់។ ប្រទេសឥណ្ឌា បាននិយាយថា កងទ័ពពីភាគីទាំងពីរបាននិងកំពុងបាញ់តគ្នាដោយប្រើប្រាស់អាវុធធុនស្រាល ប៉ុន្តែរហូតមកដល់ពេលនេះពុំមានរបាយការណ៍ពីអ្នកស្លាប់និងរងរបួសនោះទេ។

អ្នករស់នៅក្នុងភូមិ Harpal ប្រទេសប៉ាគីស្ថាន និយាយថា ភាពវឹកវរបានផ្ទុះឡើងនៅពេលមានការប៉ះទង្គិចគ្នាតាមព្រំដែន។ «ព្រំដែនមានចម្ងាយប្រហែល ៣០០យ៉ាតពីទីនេះ វាអាចមើលឃើញនៅខាងមុខនោះ»។ នៅពេលគេចាប់ផ្តើមបាញ់គ្នា គេមិនបានប្រាប់យើងទេ ហើយយើងក៏មិនបានដឹងដែរ ភ្លាមៗ មានការបាញ់ប្រហារ ហើយមនុស្សជាច្រើនបានរត់ទៅគ្រប់ទីកន្លែងដើម្បីសុវត្ថិភាព។ មនុស្សគ្រប់គ្នានៅក្នុងផ្ទះព្យាយាមជួយសង្គ្រោះជីវិតខ្លួនឯង។ ប្រជាជនអាចគេចពីគ្រាប់កាំភ្លើងបាន ប៉ុន្តែនៅពេលដែលកាំភ្លើងធំបាញ់ចេញមក គឺមនុស្សពុំអាចគេចបានឡើយ»។

នៅក្នុងភូមិមួយក្នុងរដ្ឋ Rajasthan របស់ប្រទេសឥណ្ឌា ប្រជាជនមួយចំនួនកំពុងព្រួយបារម្ភអំពីបញ្ហាប្រឈមនៃការផ្លាស់ទីសត្វពាហនៈ អំឡុងពេលកម្តៅរដូវក្តៅខ្លាំង។ អ្នកផ្សេងទៀត និយាយថាពួកគេត្រៀមខ្លួនជាស្រេចដើម្បីគាំទ្រកងទ័ពឥណ្ឌា។ យើងមិនព្រួយបារម្ភ ឬភ័យខ្លាចទេ ហើយប្រសិនបើសង្រ្គាមកើតឡើង យើងនឹងជួយកងទ័ពឥណ្ឌា បង្ហាញផ្លូវនិងជួយផ្តល់អាហារ ទឹក និងអ្វីផ្សេងទៀតដែលពួកគេត្រូវការ។

សហរដ្ឋអាមេរិក អង្គការសហប្រជាជាតិ និងប្រទេសចិន ដែលជាតួអង្គសំខាន់នៅក្នុងតំបន់ បានជំរុញប្រទេសទាំងពីរឱ្យស្ងប់ស្ងាត់ភាពតានតឹង និងអត់ធ្មត់។