នាយកប្រតិបត្តិក្រុមហ៊ុនបច្ចេកវិទ្យាយក្ស Apple លោក Tim Cook និយាយថា ទូរស័ព្ទ iPhone ភាគច្រើនដែលដាក់លក់នៅសហរដ្ឋអាមេរិកនឹងចេញមកពីប្រទេសឥណ្ឌា ដើម្បីកាត់បន្ថយផលប៉ះពាល់នៃវិធានការដំឡើងពន្ធ ដោយរដ្ឋបាលប្រធានាធិបតី លោក Donald Trump ។

លទ្ធផលអាជីវកម្ម ដែលចេញដោយក្រុមហ៊ុន Apple កាលពីថ្ងៃព្រហស្បតិ៍បង្ហាញថា ការលក់សរុបរបស់ក្រុមហ៊ុននៅក្នុងត្រីមាសពីខែមករា ដល់ខែមីនា មានចំនួនប្រហែល ៩៥,៣៦ពាន់លានដុល្លារ។ នេះគឺកើនឡើងប្រហែល៥ភាគរយធៀបនឹងដើមឆ្នាំមុន។ ប្រាក់ចំណូលសុទ្ធរបស់ក្រុមហ៊ុនមាន ២៤,៧៨ពាន់លានដុល្លារ ដែលបង្ហាញពីកំណើនប្រហែល ៤,៨ ភាគរយពីឆ្នាំមុន។

អ្នកប្រើប្រាស់នៅសហរដ្ឋអាមេរិក ត្រូវបានគេជឿថាបានប្រញាប់ប្រញាល់ទិញ iPhone និងផលិតផលផ្សេងទៀតក្នុងពេលមានការព្រួយបារម្ភថា តម្លៃរបស់វាអាចនឹងកើនឡើង បន្ទាប់ពីការប្រកាសអំពីវិធានការដំឡើងពន្ធថ្មី។ លោក Cook បាននិយាយយោងទៅលើរបាយការណ៍ព័ត៌មានដែលថាក្រុមហ៊ុនរបស់លោក មានផែនការផ្លាស់ប្តូរការផលិតទូរស័ព្ទ iPhone ដែលលក់នៅសហរដ្ឋអាមេរិក ពីប្រទេសចិន ទៅកាន់ប្រទេសឥណ្ឌា។

លោកបាននិយាយថា «សម្រាប់ត្រីមាសខែមិថុនា យើងរំពឹងថា ទូរស័ព្ទ iPhone ភាគច្រើន ដែលដាក់លក់នៅសហរដ្ឋអាមេរិកនឹងឲ្យប្រទេសឥណ្ឌាជាប្រភពដើមរបស់វា»។ លោក បាននិយាយបន្ថែមថា ប្រទេសវៀតណាម នឹងក្លាយជាប្រទេសដើមសម្រាប់ iPad និងផលិតផល Apple ស្ទើរតែទាំងអស់ផ្សេងទៀតដែលដាក់លក់នៅសហរដ្ឋអាមេរិក។

ប៉ុន្តែ លោក Cook បាននិយាយថា «ប្រទេសចិន នៅតែបន្តជាប្រទេសដើមសម្រាប់ការលក់ផលិតផលភាគច្រើន នៅក្រៅសហរដ្ឋអាមេរិក»។ បច្ចុប្បន្ន យើងមិនអាចប៉ាន់ស្មានបានច្បាស់លាស់ អំពីផលប៉ះពាល់នៃការដំឡើងពន្ធនោះទេ។