រដ្ឋមន្ត្រីក្រសួងឧស្សាហកម្មនិងពាណិជ្ជកម្មឥណ្ឌា លោក Piyush Goyal បានថ្លែង បន្ទាប់ពីកិច្ចប្រជុំរបស់លោក ជាមួយស្នងការអឺរ៉ុបទទួលបន្ទុកពាណិជ្ជកម្ម និងសន្តិសុខសេដ្ឋកិច្ចលោក Maros Sefcovic នៅទីក្រុងប្រ៊ុចសែលថា ប្រទេសឥណ្ឌា និងសហភាពអឺរ៉ុប (EU) នឹងឈានដល់កិច្ចព្រមព្រៀងពាណិជ្ជកម្មសេរីមួយ នៅចុងឆ្នាំ ២០២៥។  

លោកបាននិយាយថា កិច្ចប្រជុំនេះ ផ្តោតលើការកែលម្អលទ្ធភាពទទួលបានទីផ្សារសម្រាប់អាជីវកម្ម នៅក្នុងតំបន់ទាំងពីរ និងការពង្រឹងខ្សែច្រវ៉ាក់ផ្គត់ផ្គង់ដ៏រឹងមាំ និងចម្រុះ។ លោក Goyal បានសរសេរនៅលើ   គេហទំព័រ X របស់លោកថា៖«យើងបានបញ្ជាក់ឡើងវិញនូវការប្តេជ្ញាចិត្តរួមគ្នារបស់យើង ក្នុងការសម្រេចបាននូវការចរចាអំពីកិច្ចព្រមព្រៀងពាណិជ្ជកម្មសេរីឥណ្ឌា-សហភាពអឺរ៉ុប នៅចុងឆ្នាំ ២០២៥។

លោករដ្ឋមន្ត្រី ក៏បានបញ្ជាក់ផងដែរថា មន្ត្រីបានពិភាក្សាអំពី «ការជំរុញការធ្វើទំនើបកម្ម និងការប្រកួតប្រជែង និងតួនាទីសំខាន់នៃការវិនិយោគ និងការពន្លឿនក្នុងការរៀបចំកិច្ចព្រមព្រៀងដែលត្រៀមរួចជាស្រេចនាពេលអនាគត»។

ទីក្រុងញូវដែលី និងទីក្រុងប្រ៊ុចសែល បានធ្វើការឆ្ពោះទៅរកកិច្ចព្រមព្រៀងពាណិជ្ជកម្មសេរីអស់រយៈពេលជាច្រើនឆ្នាំហើយ។ ការពិភាក្សា បានចាប់ផ្តើម នៅក្នុងឆ្នាំ ២០០៧ ប៉ុន្តែត្រូវបានពន្យារពេល ក្នុងឆ្នាំ ២០១៣ ដោយសារការខ្វែងគំនិតគ្នាលើកម្មសិទ្ធិបញ្ញា ការការពារទិន្នន័យនៅក្នុងក្រុមហ៊ុនបច្ចេកវិទ្យា និងការចូលទៅកាន់ទីផ្សារទូទៅសម្រាប់ទំនិញមួយចំនួន ដូចជារថយន្តជាដើម។ ការចរចា បានបន្តឡើងវិញ នៅឆ្នាំ ២០២២។