ក្រសួងការបរទេសអាមេរិក កាលពីថ្ងៃព្រហស្បតិ៍ (ទី១ ខែឧសភា) បានឲ្យដឹងថា រដ្ឋមន្ត្រីការបរទេស លោក Marco Rubio បានជំរុញឲ្យសម្ព័ន្ធមិត្តអឺរ៉ុបប្តេជ្ញាផ្តល់ធនធានបន្ថែមទៀតដល់ប្រទេសអ៊ុយក្រែន ក្នុងអំឡុងពេលជួបជាមួយរដ្ឋមន្ត្រីការបរទេសបារាំង លោក Jean-Noel Barrot ដោយព្រមានថា «ត្រឹមតែពាក្យសម្ដី គឺមិនគ្រប់គ្រាន់នោះឡើយ» ក្នុងការបញ្ចប់សង្គ្រាមរបស់រុស្ស៊ី និងទទួលបានសន្តិភាពយូរអង្វែង។

យោងតាមការផ្ដល់ព័ត៌មានសង្ខេបពីអ្នកនាំពាក្យក្រសួងការបរទេស លោក Tammy Bruce បានឲ្យដឹងថា លោក Rubio បានសរសើរការដឹកនាំរបស់ប្រទេសបារាំង ក្នុងការបន្តការគាំទ្រ សម្រាប់កិច្ចព្រមព្រៀងសន្តិភាព ប៉ុន្តែបានសង្កត់ធ្ងន់ថា ដៃគូអឺរ៉ុបត្រូវតែ «បង្កើនធនធានពិតប្រាកដ និងឆន្ទៈនយោបាយ» ប្រសិនបើពួកគេសង្ឃឹមថា នឹងបញ្ចប់សង្រ្គាម។

ជំនួបនេះកើតឡើងចំពេលមានការព្រួយបារម្ភកាន់តែខ្លាំងឡើងៗ ជុំវិញលទ្ធភាពរបស់អឺរ៉ុប ក្នុងការបំពេញតាមការសន្យារបស់ខ្លួន លើវិស័យការពារជាតិ។ ដូចដែលសារព័ត៌មាន Times បានរាយការណ៍កាលពីថ្ងៃទី៣០ ខែមេសា បណ្តាប្រទេសនៅអឺរ៉ុប អាចជួបការលំបាកក្នុងការផ្តល់កងទ័ព ២៥.០០០នាក់ ដល់ «កម្លាំងទប់ស្កាត់» ពហុជាតិដែលត្រូវបានស្នើឡើង សម្រាប់អ៊ុយក្រែន ពោលគឺតិចជាងឆ្ងាយពីគោលដៅ ៦៤.០០០នាក់ ដែលស្នើឡើងដោយមន្ត្រីការពារជាតិរបស់ចក្រភពអង់គ្លេស។

ផែនការ ដែលជាផ្នែកមួយនៃអ្វីដែលហៅថា «សម្ព័ន្ធឆន្ទៈរួម» ដឹកនាំដោយចក្រភពអង់គ្លេស និងបារាំង មានគោលបំណងធានាស្ថិរភាពក្រោយសង្គ្រាម កសាងកងទ័ពអ៊ុយក្រែនឡើងវិញ និងទប់ស្កាត់ការលុកលុយរបស់រុស្ស៊ីនាពេលអនាគត៕