នាយករដ្ឋមន្ត្រីកូរ៉េខាងត្បូង លោក Han Duck-soo ដែលធ្លាប់ធ្វើជាប្រធានាធិបតីស្តីទី មុនពេលចុះចេញពីតំណែង នៅមួយថ្ងៃមុននេះ បានប្រកាសពីការចូលរួមប្រកួតប្រជែងតំណែងកំពូលរបស់ប្រទេស នៅថ្ងៃសុក្រ (ទី២ ខែឧសភា) ដោយសង្ឃឹមថា នឹងអាចប្រើប្រាស់ប្រយោជន៍ពីភាពលេចធ្លោ អំឡុងពេលធ្វើតួនាទីជាអ្នកដឹកនាំប្រទេស។

គួរបញ្ជាក់ថា ការបោះឆ្នោតជ្រើសរើសប្រធានាធិបតីរបស់ប្រទេសកូរ៉េខាងត្បូង នឹងធ្វើឡើងនៅថ្ងៃទី៣ ខែមិថុនា។ ការស្ទង់មតិរបស់ស្ថាប័ន Gallup Korea កាលពីថ្ងៃទី២៥ ខែមេសា បានបង្ហាញថា លោក Lee Jae-myung បេក្ខជនរបស់គណបក្សប្រឆាំង មានសិទ្ធិខ្ពស់ជាងគេក្នុងការទទួលបានជ័យជម្នះ នៅក្នុងការបោះឆ្នោត នាខែក្រោយ ជាមួយនឹងសំឡេង ៣៨ភាគរយ ខណៈដែលអតីតប្រធានគណបក្សអំណាចប្រជាជន (PPP) លោក Han Dong-hoon មាន ៨ភាគរយ ហើយលោក Han Duck-soo ទទួលបានការគាំទ្រ ៦ភាគរយ។

រដ្ឋមន្ត្រីក្រសួងហិរញ្ញវត្ថុ លោក Choi Sang-mok គ្រោងឡើងកាន់តំណែងជាប្រធានាធិបតីស្តីទី តាមច្បាប់ ប៉ុន្តែលោកបានលាលែងពីតំណែងភ្លាមៗ កាលពីពាក់កណ្តាលអធ្រាត្រថ្ងៃព្រហស្បតិ៍ (ទី១ ខែឧសភា)។

សម្រាប់ពេលនេះ រដ្ឋមន្ត្រីក្រសួងអប់រំ លោក Lee Ju-ho បានចូលកាន់តំណែងជាអ្នកដឹកនាំស្តីទី ដោយជំរុញឲ្យលោកបានចូលទៅក្នុងការងារជាអ្នកកាច់ចង្កូតប្រទេសដែលមានសេដ្ឋកិច្ចធំបំផុតទី៤ របស់អាស៊ី តាមរយៈភាពចលាចលនយោបាយ ដែលបង្កឡើងដោយការប៉ុនប៉ងចេញច្បាប់អាជ្ញាសឹកកាលពីឆ្នាំមុនរបស់ប្រធានាធិបតីធ្លាក់ចេញពីតំណែង លោក Yoon Suk Yeol និងផលប៉ះពាល់ពីការដំឡើងពន្ធដ៏ធ្ងន់ធ្ងររបស់សហរដ្ឋអាមេរិក៕