រដ្ឋបាលប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (ទី១ ខែឧសភា) បានតែងតាំងអ្នកការទូតអាជីពជាបេសកជនជាន់ខ្ពស់របស់ខ្លួន នៅក្នុងប្រទេសអ៊ុយក្រែន ដោយដាក់ឲ្យអ្នកមានបទពិសោធន៍ខ្ពស់ម្នាក់ទៀតទទួលបន្ទុកការងារ បន្ទាប់ពីមានភាពចលាចលក្នុងទំនាក់ទំនងក្នុងសម័យសង្គ្រាម។

ក្រសួងការបរទេស បានប្រាប់ឲ្យដឹងថា លោកស្រី Julie Davis ដែលបានចំណាយពេលច្រើនក្នុងអាជីពរបស់លោកស្រីនៅក្នុងអតីតសហភាពសូវៀត នឹងធ្វើជាភារធារីនៅទីក្រុងគីវ ជាមុខតំណែងស្ថានទូតជាន់ខ្ពស់ដែលកំពុងរង់ចាំការតែងតាំង និងការបញ្ជាក់ឋានៈជាឯកអគ្គរដ្ឋទូតរបស់ព្រឹទ្ធសភា។

គួរបញ្ជាក់ថា លោកស្រីឯកអគ្គរដ្ឋទូត Bridget Brink ដែលជាអ្នកការទូតអាជីពផងដែរនោះ បានលាលែងពីតំណែងកាលពីខែមេសា។ លោកស្រីបានស្នាក់នៅក្នុងទីក្រុងគីវ អស់រយៈពេល ៣ឆ្នាំ ដែលជាការកាន់តួនាទីដ៏លំបាកបំផុត ដោយសារមានការលុកលុយរបស់រុស្ស៊ី។

ការតែងតាំងលោកស្រី Davis នេះ ត្រូវបានប្រកាសមួយថ្ងៃបន្ទាប់ពីអ៊ុយក្រែន និងសហរដ្ឋអាមេរិក បានចុះហត្ថលេខាលើកិច្ចព្រមព្រៀងរ៉ែ ដែលទីក្រុងគីវ មើលឃើញថា ជាមធ្យោបាយថ្មីមួយ ដើម្បីធានាដល់ការប្តេជ្ញាចិត្តរបស់សហរដ្ឋអាមេរិក បើទោះបីជាលោក Trump ជំទាស់នឹងការផ្ដល់ជំនួយយោធា និងជំរុញឲ្យមានដំណោះស្រាយសង្រ្គាម ដែលប្រជាជនអ៊ុយក្រែនជាច្រើនយល់ថា ផ្ដល់ភាពចំណេញឲ្យរុស្ស៊ីក៏ដោយ៕