យោងតាមការិយាល័យ Met បានឲ្យដឹងថា ចក្រភពអង់គ្លេសបានកត់ត្រានូវអាកាសធាតុក្តៅបំផុតមិនធ្លាប់មាន កាលពីថ្ងៃព្រហស្បតិ៍ (ទី១ ខែឧសភា) ពោលគឺជាថ្ងៃឈប់សម្រាក May Day ដោយទើបតែបានជួបប្រទះនូវថ្ងៃដែលមានពន្លឺខ្លាំងបំផុត ក្នុងខែមេសា គិតចាប់តាំងពីការកត់ត្រាបានចាប់ផ្តើមមាន។

សីតុណ្ហភាពដែលមិនធ្លាប់មានពីមុនមក ២៩,៣អង្សាសេ ត្រូវបានកត់ត្រានៅឧទ្យានរុក្ខសាស្ត្រដ៏ល្បីល្បាញ Kew Gardens នៅភាគនិរតីទីក្រុងឡុងដ្រ៍។ កំណត់ត្រាពីមុន ២៧,៤អង្សាសេ គឺមានក្នុងឆ្នាំ១៩៩០ នៅទីក្រុងឆ្នេរ Lossiemouth ភាគខាងជើងនៃប្រទេសស្កុតឡេន។

ថ្ងៃទី១ ខែឧសភា ក៏ជាថ្ងៃក្តៅបំផុតនៃឆ្នាំផងដែរ រហូតមកដល់ពេលនេះ នៅក្នុងប្រទេស។ មិនខុសពីបណ្តាប្រទេសអ៊ឺរ៉ុបដទៃទៀតដែរ ចក្រភពអង់គ្លេស បាននិងកំពុងជួបប្រទះរលកកម្ដៅចាប់តាំងពីដើមសប្តាហ៍មក។

យោងតាមការព្យាករដំបូងរបស់ការិយាល័យ Met ខែមេសាគឺជាថ្ងៃដែលមានពន្លឺខ្លាំងបំផុតលើកដំបូង គិតចាប់តាំងពីកំណត់ត្រាឧតុនិយម បានចាប់ផ្តើមកើតមាននៅឆ្នាំ១៩១០។

ហើយវាក៏ជាការមានអាកាសធាតុក្ដៅបំផុតប្រចាំខែមេសាលើកទី ៣ ផងដែរ ដោយមានសីតុណ្ហភាពជាមធ្យម ៩,៦អង្សាសេ ពោលគឺលើស ១,៧អង្សាសេពីកម្រិតមធ្យមភាគរយៈពេលវែង។ អ្នកឧតុនិយមរបស់ការិយាល័យ Met លោក Aidan McGivern បាននិយាយថា «ព្រះអាទិត្យ គឺមានពន្លឺខ្លាំង ដែលជាធម្មតានៅក្នុងខែសីហា»៕