យោធាអ៊ីស្រាអែល បាននិយាយនៅថ្ងៃសុក្រនេះថា ខ្លួនបានបាញ់ទម្លាក់មីស៊ីលដែលបាញ់ចេញពីប្រទេសយេម៉ែន ជាការវាយប្រហារមួយដែលត្រូវបានអះអាងដោយក្រុមសកម្មប្រយុទ្ធហ៊ួទី ដែលគាំទ្រដោយអ៊ីរ៉ង់របស់ប្រទេសឧបទ្វីបអារ៉ាប់នេះ។

យោធាបានអះអាងថា៖«បន្ទាប់ពីស៊ីរ៉ែនដែលបានបន្លឺឡើង មួយស្របក់ នៅក្នុងតំបន់ជាច្រើន ក្នុងប្រទេសអ៊ីស្រាអែល មីស៊ីលដែលបានបាញ់ចេញពីប្រទេសយេម៉ែន ត្រូវបានស្ទាក់ចាប់» មុនពេលចូលទៅក្នុងទឹកដីអ៊ីស្រាអែល។

ក្រុមហ៊ួទី ដែលគ្រប់គ្រងផ្នែកធំនៃប្រទេសយេម៉ែន បាននិយាយថា ពួកគេបានកំណត់គោលដៅលើមូលដ្ឋានទ័ពអាកាស» ភាគខាងកើតនៃតំបន់Haifa ដែលគ្រប់គ្រងដោយអ៊ីស្រាអែល ជាមួយនឹង«មីស៊ីលបាលីស្ទីកល្បឿនលឿនជាងសំឡេង។

ក្រុមឧទ្ទាមនេះ បានធ្វើការវាយប្រហារដោយមីស៊ីល និងយានដ្រូនរាប់សិបលើក ទៅលើអ៊ីស្រាអែល ចាប់តាំងពីសង្រ្គាមហ្កាហ្សា បានចាប់ផ្តើមជាមួយនឹងការវាយប្រហារដែលមិនធ្លាប់មានពីមុនមករបស់ក្រុមសកម្មប្រយុទ្ធហាម៉ាស កាលពីថ្ងៃទី ០៧ ខែតុលា ឆ្នាំ ២០២៣។