បើយោងតាមមន្ត្រីរដ្ឋបាលដែលដឹងពីបញ្ហានេះ បានបង្ហើបថា ប្រធានាធិបតីអាមេរិក លោក Donald Trump នឹងស្នើការចំណាយផ្នែកសន្តិសុខជាតិចំនួន ១,០១សែនកោដិដុល្លារ សម្រាប់ឆ្នាំសារពើពន្ធ ចាប់ពីថ្ងៃទី១ ខែតុលា ដោយមានកម្រិតច្រើនជាង ១៣ភាគរយ ធៀបនឹងតួលេខឆ្នាំបច្ចុប្បន្ន។

ថវិកាវិស័យការពារជាតិ នឹងផ្តល់មូលនិធិដល់គម្រោងប្រព័ន្ធការពារមីស៊ីល Golden Dome ការសាងសង់នាវា ការធ្វើទំនើបកម្មនុយក្លេអ៊ែរ និងសន្តិសុខព្រំដែន។ កញ្ចប់នោះក៏រួមបញ្ចូលទាំងការដំឡើងប្រាក់ខែយោធា ៣,៨ភាគរយផងដែរ។

ពាក់ព័ន្ធនឹងកិច្ចពិភាក្សាអំពីតួលេខនៃចំណាយដែលមិនត្រូវបានបញ្ចេញឲ្យដឹងជាសាធារណៈនោះ មន្ត្រីម្នាក់ក្នុងចំណោមមន្ត្រីដែលសុំមិនបង្ហាញអត្តសញ្ញាណ បាននិយាយថា ការកើនឡើង ១៣ភាគរយ បានឆ្លុះបញ្ចាំងឡើងវិញពីការពង្រឹងវិស័យការពារជាតិ ក្រោមការគ្រប់គ្រងរបស់អតីតប្រធានាធិបតី លោក Ronald Reagan។

គួរបញ្ជាក់ថា រដ្ឋបាលរបស់លោក Trump បានព្យាយាមកាត់បន្ថយការចំណាយមួយចំនួន នៅមន្ទីរបញ្ចកោណ ដែលជាផ្នែកនៃកិច្ចប្រឹងប្រែងកាត់បន្ថយការចំណាយរបស់លោក Elon Musk ប៉ុន្តែនិយាយថា ខ្លួនចង់បានថវិកាការពារជាតិកាន់តែខ្ពស់ជាងនេះ។

សំណើជារួម ដែលបញ្ចូលទាំងការផ្តល់មូលនិធិគាំទ្រផ្នែកការពារជាតិ សម្រាប់ក្រសួងថាមពល ការិយាល័យស៊ើបអង្កេតសហព័ន្ធ និងទីភ្នាក់ងារតូចៗផ្សេងទៀត សរុបប្រហែល ៣,២ភាគរយនៃផលិតផលក្នុងស្រុកសរុប (GDP) ស្រដៀងទៅនឹងតួលេខឆ្នាំសារពើពន្ធ២០២៤។

ចំនួននេះកើនឡើងពីកម្រិត ៨៩២,៣ពាន់លានដុល្លារ នៅក្នុងការចំណាយសន្តិសុខជាតិសរុប សម្រាប់ឆ្នាំ២០២៥។ តួលេខនេះនឹងត្រូវបានបង្ហាញជាផ្នែកនៃសំណើថវិកា សម្រាប់ឆ្នាំសារពើពន្ធ២០២៦ ដែលលោក Trump គ្រោងនឹងចេញផ្សាយនៅថ្ងៃទី២ ខែឧសភា៕