TikTok ត្រូវបានពិន័យចំនួន ៥៣០លានអឺរ៉ូ (៦០០លានដុល្លារ) ដោយនិយតករឯកជនដ៏ធំរបស់ប្រទេស នៅសហភាពអឺរ៉ុប (EU) នាថ្ងៃសុក្រ (ទី២ ខែឧសភា) នេះ ពាក់ព័ន្ធនឹងក្ដីបារម្ភ អំពីវិធីដែលបណ្ដាញសង្គមមួយនេះការពារព័ត៌មានរបស់អ្នកប្រើប្រាស់ ហើយត្រូវបានបញ្ជាឲ្យផ្អាកផ្ទេរទិន្នន័យទៅកាន់ប្រទេសចិន ប្រសិនបើដំណើរការមិនត្រូវបានអនុលោមតាមច្បាប់ ក្នុងរង្វង់រយៈពេល ៦ខែ។

ស្នងការការពារទិន្នន័យ (DPC) របស់ប្រទេសអៀរឡង់ បានឲ្យដឹងថា TikTok ដែលជាកម្មសិទ្ធិរបស់ក្រុមហ៊ុនចិន ByteDance មិនបានបង្ហាញថា ទិន្នន័យផ្ទាល់ខ្លួនរបស់អ្នកប្រើប្រាស់ EU ដែលខ្លះត្រូវបានចូលប្រើពីចម្ងាយដោយបុគ្គលិកនៅក្នុងប្រទេសចិន ទទួលបានការការពារកម្រិតខ្ពស់ដែលត្រូវបានផ្តល់ឲ្យ ក្រោមច្បាប់របស់ EU។

DPC បានឲ្យដឹងនៅក្នុងសេចក្តីថ្លែងការណ៍មួយថា ជាលទ្ធផល កម្មវិធីបង្ហោះវីដេអូខ្លី មិនបានដោះស្រាយការចូលប្រើប្រាស់ដែលអាចកើតមាន ចំពោះទិន្នន័យអ្នកប្រើប្រាស់ ក្រោមច្បាប់ប្រឆាំងចារកម្ម និងច្បាប់ផ្សេងទៀត ដែល TikTok កំណត់ថា ផ្ទុយគ្នាយ៉ាងច្រើនពីស្តង់ដាររបស់សហភាពអឺរ៉ុបនោះឡើយ។

ពាក់ព័ន្ធនឹងករណីនេះ TikTok បានប្រាប់ថា ខ្លួនបានជំទាស់យ៉ាងខ្លាំងក្លា ចំពោះការពិន័យនេះ ហើយថា ខ្លួនបានប្រើប្រាស់ក្របខ័ណ្ឌច្បាប់ផ្ទាល់របស់ EU ជាពិសេសអ្វីដែលត្រូវបានហៅថា ឃ្លាកិច្ចសន្យាស្តង់ដារ ដើម្បីផ្តល់សិទ្ធិចូលប្រើប្រាស់ពីចម្ងាយដែលមានការគ្រប់គ្រងយ៉ាងតឹងរ៉ឹង និងមានកម្រិត។ ក្រុមហ៊ុនគ្រោងនឹងប្តឹងឧទ្ធរណ៍ ចំពោះការសម្រេចនេះ៕