រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃព្រហស្បតិ៍ (ទី១ ខែឧសភា) បានបញ្ជាក់ថា អ៊ីរ៉ង់ ត្រូវតែ «បោះបង់» ការចម្រាញ់សារធាតុអ៊ុយរ៉ាញ៉ូម និងការអភិវឌ្ឍមីស៊ីលរយៈចម្ងាយឆ្ងាយ ហើយថា ប្រទេសនេះគួរតែអនុញ្ញាតិឲ្យមន្ត្រីអធិការកិច្ចអាមេរិកចូលទៅពិនិត្យរោងចក្ររបស់ខ្លួន ។

ការអត្ថាធិប្បាយបែបនេះរបស់លោក Rubio គូសបញ្ជាក់ពីការខ្វែងគំនិតគ្នាក្នុងបញ្ហាសំខាន់ៗដែលនៅសេសសល់ជាច្រើន នៅក្នុងកិច្ចពិភាក្សា រវាងប្រទេសទាំង២ ដើម្បីដោះស្រាយជម្លោះដ៏រ៉ាំរ៉ៃ ជុំវិញកម្មវិធីនុយក្លេអ៊ែររបស់អ៊ីរ៉ង់ ដោយប្រធានាធិបតីអាមេរិក លោក Donald Trump គំរាមទម្លាក់គ្រាប់បែកលើអ៊ីរ៉ង់ ប្រសិនបើគ្មានកិច្ចព្រមព្រៀងទេនោះ។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Fox News លោក Rubio បានសង្កត់ធ្ងន់ថា៖ «ពួកគេត្រូវបោះបង់ការឧបត្ថម្ភដល់ភេរវករ ពួកគេត្រូវតែបោះបង់ការជួយដល់ក្រុមហ៊ួទី (នៅយេម៉ែន) ពួកគេត្រូវបោះបង់ការផលិតមីស៊ីលរយៈចម្ងាយឆ្ងាយដែលគ្មានគោលបំណងអ្វីក្រៅពីផលិតអាវុធនុយក្លេអ៊ែរ ហើយពួកគេត្រូវតែបោះបង់ការចម្រាញ់»។

អ៊ីរ៉ង់បានលើកម្តងហើយម្តងទៀតថា ខ្លួននឹងមិនបោះបង់នោះឡើយនូវកម្មវិធីមីស៊ីលរបស់ខ្លួន ឬការចម្រាញ់សារធាតុអ៊ុយរ៉ាញ៉ូម ជាដំណើរការដែលត្រូវបានប្រើប្រាស់ដើម្បីផលិតឥន្ធនៈ សម្រាប់រោងចក្រថាមពលនុយក្លេអ៊ែរ ប៉ុន្តែដែលអាចផ្តល់ទិន្នផលសម្ភារៈ សម្រាប់ក្បាលគ្រាប់បរមាណូផងដែរ។

នៅថ្ងៃព្រហស្បតិ៍នោះ មន្ត្រីជាន់ខ្ពស់អ៊ីរ៉ង់បានប្រាប់សារព័ត៌មាន Reuters ថា កិច្ចចរចាជុំទី៤ ដែលគ្រោងនឹងធ្វើឡើងនៅទីក្រុងរ៉ូម ប្រទេសអ៊ីតាលី នៅថ្ងៃសៅរ៍ចុងសប្ដាហ៍នេះ ត្រូវបានលើកពេល ហើយកាលបរិច្ឆេទថ្មី នឹងត្រូវបានកំណត់ «អាស្រ័យលើវិធីសាស្រ្តរបស់សហរដ្ឋអាមេរិក»៕