ក្រុមប្រឹក្សាការពារជាតិជាន់ខ្ពស់របស់ទីក្រុង Beirut នៅថ្ងៃសុក្រ (ទី២ ខែឧសភា) នេះ បានប្រាប់ឲ្យដឹងថា លីបង់បានព្រមានក្រុមសកម្មប្រយុទ្ធហាម៉ាសប៉ាឡេស្ទីន កុំឲ្យធ្វើប្រតិបត្តិការដែលប៉ះពាល់ដល់សន្តិសុខ ឬអធិបតេយ្យភាពរបស់ប្រទេស។

សេចក្តីប្រកាសនេះបានកើតមានឡើង ស្របពេលដែលលីបង់ត្រូវប្រឈមជាមួយនឹងសម្ពាធកាន់តែខ្លាំងឡើងៗរបស់សហរដ្ឋអាមេរិក ក្នុងការឲ្យដកអាវុធក្រុមសកម្មប្រយុទ្ធ នៅក្រៅការគ្រប់គ្រងរបស់រដ្ឋ បន្ទាប់ពីមានសង្រ្គាមកាលពីឆ្នាំមុន រវាងអ៊ីស្រាអែល និងក្រុមប្រដាប់អាវុធហេសបូឡារបស់លីបង់ ដែលជាសម្ព័ន្ធមិត្តរបស់ក្រុមហាម៉ាស។

បទឈប់បាញ់ដែលបញ្ចប់ជម្លោះនោះ បានអំពាវនាវឲ្យលីបង់រំសាយ «ក្រុមប្រដាប់អាវុធទាំងអស់នៅក្នុងប្រទេសលីបង់» និងរុះរើហេដ្ឋារចនាសម្ព័ន្ធយោធាដែលមិនស្របច្បាប់។

អគ្គលេខាធិការនៃក្រុមប្រឹក្សាការពារជាតិកំពូល លោក Mohammad al-Mustafa បានប្រាប់អ្នកសារព័ត៌មាននៅថ្ងៃសុក្រនេះថា ស្ថាប័ននេះនឹងផ្តល់អនុសាសន៍ជាបន្តបន្ទាប់នៃការសម្រេចនានាទៅកាន់គណៈរដ្ឋមន្ត្រីរបស់ប្រទេសលីបង់ ក្នុងនោះរួមទាំង «ការព្រមានក្រុមហាម៉ាសកុំឲ្យប្រើប្រាស់ដែនដីលីបង់ ដើម្បីអនុវត្តសកម្មភាពណាមួយដែលគំរាមកំហែងដល់សន្តិសុខជាតិលីបង់»។

គួរបញ្ជាក់ថា ក្រុមហាម៉ាសបង្ហាញវត្តមានជាយូរមកហើយ នៅប្រទេសលីបង់ ក្នុងនោះរួមទាំងមាននៅក្នុងជំរុំនានាទូទាំងប្រទេសដែលទទួលជនភៀសខ្លួនប៉ាឡេស្ទីនរាប់សែននាក់ និងជាកន្លែងដែលកងកម្លាំងសន្តិសុខលីបង់មានសិទ្ធិអំណាចគ្រប់គ្រងដោយមានកម្រិតជាយូរមកហើយ៕