ប្រព័ន្ធផ្សព្វផ្សាយអ៊ីស្រាអែល បានរាយការណ៍កាលពីថ្ងៃសុក្រទី២ ខែឧសភា ថា គណៈរដ្ឋមន្ត្រីសន្តិសុខរបស់ប្រទេសអ៊ីស្រាអែល បានអនុម័តផែនការសម្រាប់ប្រតិបត្តិការដែលត្រូវពង្រីកនៅក្នុងតំបន់ហ្កាហ្សាស្ទ្រីប ដោយបន្ថែមលើសញ្ញាថាការប៉ុនប៉ងដើម្បីបញ្ឈប់ការប្រយុទ្ធ និងនាំយកចំណាប់ថ្នូរមកវិញដែលត្រូវបានឃុំខ្លួនដោយក្រុមហាម៉ាស លែងមានវឌ្ឍនភាព។ ការសម្រេចនេះ បានធ្វើឡើងបន្ទាប់ពីមានការអត្ថាធិប្បាយពីទាំងនាយករដ្ឋមន្ត្រី លោក Benjamin Netanyahu និងប្រមុខយោធា លោកឧត្តមសេនីយ Eyal Zamir ក្នុងសប្តាហ៍នេះ ដែលបង្ហាញថាអ៊ីស្រាអែល មានបំណងបង្កើនយុទ្ធនាការនៅតំបន់ហ្កាហ្សា។

ចាប់តាំងពីការដួលរលំកិច្ចព្រមព្រៀងបទឈប់បាញ់ដំបូងកាលពីខែមីនាមក ទាហានអ៊ីស្រាអែល បាននិងកំពុងពង្រីកខ្លួនចូលក្នុងតំបន់ទ្រនាប់ដ៏ធំទូលាយនៅក្នុងតំបន់ហ្កាហ្សា ដោយបានបង្រួញប្រជាជនចំនួន ២,៣លាននាក់ឱ្យនៅក្នុងតំបន់តូចចង្អៀតមិនធ្លាប់មាននៅកណ្តាលតំបន់ហ៊ុមព័ទ្ធនេះ និងនៅតាមបណ្តោយឆ្នេរ ហើយបានបិទច្រកមិនឲ្យរថយន្តដឹកជំនួយចូលទៅ។

បណ្តាញព័ត៌មានសំខាន់មួយរបស់អ៊ីស្រាអែលដែលបានដកស្រង់សម្តីមន្ត្រីអ៊ីស្រាអែលម្នាក់បាននិយាយថា «ដរាបណាក្រុមហាម៉ាស មិនដោះលែងចំណាប់ថ្នូររបស់យើង យើងនឹងធ្វើឱ្យសកម្មភាពយោធារបស់យើងកាន់តែខ្លាំងក្លា»។ លោក Netanyahu បាននិយាយថា ខណៈអ៊ីស្រាអែលកំពុងស្វែងរកការវិលត្រឡប់មកវិញនៃចំណាប់ថ្នូររបស់ខ្លួន ដែលក្នុងនោះមានរហូតដល់២៤នាក់ត្រូវបានគេជឿថានៅមានជីវិតរស់នៅ គោលដៅចុងក្រោយរបស់ខ្លួននៅហ្កាហ្សា គឺនៅតែត្រូវកម្ចាត់ក្រុមហាម៉ាស។ 

ទោះបីជាមានការខិតខំប្រឹងប្រែងពីសំណាក់ក្រុមអ្នកសម្រុះសម្រួលអេហ្ស៊ីប និងកាតា ដើម្បីស្ដារបទឈប់បាញ់ក៏ដោយ ទាំងអ៊ីស្រាអែលនិងក្រុមហាម៉ាស ពុំបានបង្ហាញពីឆន្ទៈដើម្បីដកថយចំពោះការទាមទារស្នូលនោះទេ ដោយភាគីនីមួយៗបានបន្ទោសគ្នាទៅវិញទៅមកចំពោះការបរាជ័យក្នុងការឈានដល់កិច្ចព្រមព្រៀង។