បាល់ទាត់៖ ​ក្រុម​ឥណ្ឌូនេស៊ី​ទើប​ចាប់ផ្តើម​ប្រកួត​ដំបូង​របស់ខ្លួន​ នៅ​ព្រឹត្តិការណ៍​បាល់ទាត់​ជើងឯក​អាស៊ាន AFF Championship ជាមួយ​នឹង​​ជ័យជំនះ ៤-២ លើ​ក្រុម​គោព្រៃ​កម្ពុជា​។ ចាប់ផ្តើម​បានតែ ៤នាទី​ឥណ្ឌូនេស៊ី​បើក​ការនាំ​មុខមុន​ទៅហើយ​ដោយ Rachmat Irianto មុន​ពេលដែល​ប្រធាន​ក្រុម Evan Dimas បន្ថែម​មួយគ្រា​ប់​ទៀត​នៅ​នាទី​ទី១៧​។

​ឈានដល់​នាទី​ទី៣៣ Rachmat Irianto ដដែល​ក៏​រកបាន​គ្រាប់​ទី​២ របស់ខ្លួន​ដែលជា​គ្រាប់​បាល់​ចេញពី​បាល់​ជ្រុង​ម្តងទៀត មុន​ពេលដែល​កម្ពុ​ជាតា​ម​បាន ១​គ្រាប់​វិញ​ដោយ​បាល់​ជ្រុង​ដែរ​តែ​ត​បញ្ចូល​ទី​ដោយ​ខ្សែការពារ​ភ្នំពេញ​ក្រោម យើ សា​ហ្វី​ នៅ​នាទី​ទី៣៧​។ វគ្គ​ទី២ ឥណ្ឌូនេ​ស៊ី​ក៏បាន​បន្ថែម​ ១​គ្រាប់​ទៀត​នៅ​នាទី​ទី៥៤ ដោយ Ramai Rumakiek មុនពេល​ដែល​កីឡាករ​បម្រុង​ផ្លាស់ប្តូរ​ចូល ប្រាក់ មុន្នី​ឧ​ត្ត​ម ស៊ុត​បាល់​ហ្វ្រី​ឃី​ក​តាម​ពីក្រោយ ៤-២​។ ​លទ្ធផល​នេះ​បាន​រក្សា​ដល់​ចប់​ការប្រកួត​ធ្វើឱ្យ​ឥណ្ឌូនេស៊ី​រកបាន​ ៣ពិន្ទុ​ដំបូង​របស់ខ្លួន ខណៈ​កម្ពុជា​រង​​បរាជ័យ​ពីរ​ប្រកួត​ផ្ទួនៗ​។ ​ក្រោយ​ចប់​ការប្រកួត​គ្រូបង្វឹក​ឥណ្ឌូនេស៊ី​លោក Shin Tae-Yong បាន​និយាយថា ថ្វីបើ​ឈ្នះ​មែន​តែ​ការ​របូត​គ្រាប់​បាល់​ពីរ​គ្រាប់​នេះ លោក​បានឃើញ​ពី​បញ្ហា​នៅ​តំបន់​ការពារ​ដែល​ត្រូវ​កែប្រែ​ជា​ចំ​បាច់​។

ចំណែក​គ្រូបង្វឹក​កម្ពុជា​លោក Ryu Hiroshe បាន​និយាយថា ១១នាក់​ដំបូង​របស់​ក្រុម​លោក​រំពឹងថា​កីឡាករ​ក្មេងៗ​នឹងធ្វើ​បានល្អ តែ​បទពិសោធ​របស់​ពួកគេ​បានធ្វើឱ្យ​វគ្គ​ទី១ យើង​របូត​គ្រាប់​បាល់​ច្រើន លុះ​ចូល​វគ្គ​ទី២ កីឡាករ​ដែលមាន​បទ​ពិសោធ​មួយចំនួន​ត្រូវ​ផ្លាស់ប្តូរ​ចូល ​ទើប​យើងឃើញ​ពី​គុណភាព​របស់​ក្រុម ហើយ​វគ្គ​ទី២ ជាការ​ប្រកួត​ដ៏​ល្អ​មួយ​។ ​សូមបញ្ជាក់ថា​ ជ័យជំនះ​នេះ​ធ្វើឱ្យ​ឥណ្ឌូនេស៊ី​ឡើងឈរ​លេខ ២ មាន ៣ពិន្ទុ​ខណៈ​កម្ពុជា​ឈរ​លេខ ៤ មាន​ ០ពិន្ទុ​ក្រោយ​បរាជ័យ​ពីរ​ប្រកួត​ផ្ទួនៗ​។​ ​ប្រកួត​បន្ទាប់​កម្ពុជា​ត្រូវ​ជួប​ឡាវ​នៅ​ថ្ងៃទី១៥ ខែធ្នូ​នេះ​ ខណៈ​ឥណ្ឌូនេស៊ី​​ក៏​ជួប​ឡាវ​ដែរ​នៅ​ថ្ងៃទី១២៕

​អត្ថបទ​៖​នាង សុភា​វុ​ធ