ក្រសួងការបរទេសអ៊ីរ៉ង់ កាលពីថ្ងៃសុក្រ បានសង្កត់ធ្ងន់ថា ខណៈពេលដែលនៅតែប្តេជ្ញាចិត្តចំពោះផ្លូវនៃការទូត ប្រទេសនេះ នឹងមិនអត់ឱនចំពោះវិធីសាស្រ្តផ្អែកលើសម្ពាធនិងការគំរាមកំហែងរបស់សហរដ្ឋ   អាមេរិកឡើយ។

ក្រសួងបានធ្វើការអត្ថាធិប្បាយនៅក្នុងសេចក្តីថ្លែងការណ៍មួយប្រតិកម្មទៅនឹងការបង្ហោះ នៅលើវេទិកាប្រព័ន្ធផ្សព្វផ្សាយសង្គម Truth Social កាលពីថ្ងៃព្រហស្បតិ៍ ដោយប្រធានាធិបតីអាមេរិកលោក ដូណាល់ ត្រាំ ( Donald Trump) ដែលបាននិយាយថា រាល់ការទិញប្រេងអ៊ីរ៉ង់ ឬផលិតផលគីមីឥន្ធនៈ ត្រូវតែបញ្ឈប់ជាបន្ទាន់ ក៏ដូចជាទណ្ឌកម្មថ្មីរបស់សហរដ្ឋអាមេរិក ដែលបានដាក់កាលពីដើមសប្តាហ៍នេះ ទៅលើបុគ្គល និងអង្គភាពមួយចំនួន នៅក្នុងប្រទេសអ៊ីរ៉ង់ និងប្រទេសដទៃទៀត។

ក្រសួងបាននិយាយថា៖«ខណៈពេលដែលសង្កត់ធ្ងន់លើការប្តេជ្ញាចិត្តរបស់ខ្លួនចំពោះផ្លូវការទូត និងប្រកាសការត្រៀមខ្លួនសម្រាប់ការបន្តការចរចា (សម្របសម្រួលដោយប្រយោល) របស់ប្រទេសអូម៉ង់ (ជាមួយសហរដ្ឋអាមេរិក) សាធារណរដ្ឋឥស្លាមអ៊ីរ៉ង់ នឹង មិនអត់ឱនចំពោះវិធីសាស្រ្តដែលផ្អែកលើការគំរាមកំហែង និងសម្ពាធនោះទេ ទោះបីជាស្ថិតនៅក្នុងកាលៈទេសៈណាក៏ដោយ។

ទីក្រុងតេអេរ៉ង់ បានថ្កោលទោសយ៉ាងខ្លាំងចំពោះការបន្តដាក់ទណ្ឌកម្ម និងសម្ពាធ «ខុសច្បាប់»របស់សហរដ្ឋអាមេរិក លើអ៊ីរ៉ង់ និងដៃគូពាណិជ្ជកម្មរបស់ខ្លួន ហើយបានចាត់ទុកពួកវាថា ជាសញ្ញាមួយផ្សេងទៀតដែលបង្ហាញថា ប្រទេសអ៊ីរ៉ង់មានសិទ្ធិសង្ស័យទាំងស្រុងអំពីភាពហ្មត់ចត់របស់សហរដ្ឋអាមេរិក នៅក្នុងផ្លូវការទូត។