អាជ្ញាធរវ៉េណេហ្ស៊ុយអេឡា បាននិយាយថា ក្រុមជនអន្តោប្រវេសន៍វ៉េណេហ្ស៊ុយអេឡាចំនួន ១៧៤នាក់ ដែលត្រូវបាននិរទេសចេញពីសហរដ្ឋអាមេរិក បានមកដល់អាកាសយានដ្ឋានអន្តរជាតិ Maiquetia ទីក្រុងការ៉ាកាស កាលពីថ្ងៃសុក្រ។

រដ្ឋមន្ត្រីក្រសួងមហាផ្ទៃលោក Diosdado Cabello បានស្វាគមន៍ក្រុមនេះ ដែលរួមមានបុរស ១៤២នាក់ ស្ត្រី ១៨ នាក់ ម្តាយ ៦នាក់ និងកុមារ ៨នាក់ ហើយពួកទាំងអស់គ្នា ត្រូវបានដឹកជញ្ជូនតាមជើងហោះហើរដែលមានមូលដ្ឋាន នៅសហរដ្ឋអាមេរិក។

ការធ្វើមាតុភូមិនិវត្តន៍នេះ គឺជាផ្នែកមួយនៃ«ផែនការ Vuelta a la Patria» របស់ប្រទេសវ៉េណេហ្ស៊ុយអេឡា (ត្រឡប់ទៅមាតុភូមិវិញ) ដែលជាគំនិតផ្តួចផ្តើមរបស់រដ្ឋាភិបាល ក្នុងគោលបំណងធ្វើសមាហរណកម្មជនអន្តោប្រវេសន៍ ដែលវិលត្រឡប់មកវិញ។

លោក Cabello បាននិយាយថា៖«ប្រតិបត្តិការទាំងនេះ តម្រូវឲ្យមានកិច្ចខិតខំប្រឹងប្រែងសម្របសម្រួលវិសាមញ្ញ។ ពុំមានកម្មវិធីដូចផែនការធ្វើមាតុភូមិនិវត្តន៍របស់ប្រទេសវ៉េណេហ្ស៊ុយអេឡាទេ»។

លោកក៏បានលើកឡើងពីការព្រួយបារម្ភចំពោះក្មេងស្រីអាយុ ២ឆ្នាំម្នាក់ ឈ្មោះ Maikelys Espinoza ដែលត្រូវបានគេរាយការណ៍ថា បានបែកគ្នាពីម្តាយរបស់នាង មុនពេលយន្តហោះនិរទេស បានហោះចេញ    ពីសហរដ្ឋអាមេរិក។