​បាល់ទាត់៖ ​អតីត​ក្រុម​ជើងឯក​អាស៊ាន AFF Championship ឆ្នាំ២០១០ ម៉ាឡេស៊ី​បន្ត​រកបាន​ជ័យជំនះ​ ២​ប្រកួត​ផ្ទួនៗ​ក្រោយ​យកឈ្នះ​ឡាវ ៤-០ ដោយ​គ្រាប់​បាល់​ ៣​គ្រាប់​ម្នាក់ឯង​របស់ Safawi Rasid​។ ​​ខ្សែប្រយុទ្ធ​វ័យ ២៤ឆ្នាំ​របស់​ក្លិប​ Joho Darul Ta’zim រូបនេះ​រក​បាន​​គ្រាប់​ដំបូង​របស់ខ្លួន​នៅ​នាទី​ទី៧ និង​គ្រាប់​ទី​ពីរ​នៅ​នាទី​ទី៣៤​។

​​វគ្គ​ទី២ Sharul Saad រកបាន​គ្រាប់​នាំមុខ ៣-០ ឱ្យ​ម៉ាឡេស៊ី​ខណៈ Safawi Rasid រកបាន​គ្រាប់​ទី​៣ ​របស់ខ្លួន​ក្នុងការប្រកួត​នៅ​នាទី​ទី៨០ និង​ជា​គ្រាប់​ទី៤ ក្នុង​ព្រឹត្តិការណ៍​បន្ទាប់ពី​រកបាន​មួយ​គ្រាប់​ដែរ​ពេល​ជួប​កម្ពុជា​។ ​​ក្រោយ​ចប់​ការប្រកួត​គ្រូបង្វឹក​ម៉ាឡេស៊ី​លោក Tan Cheng-Hoe និយាយថា នេះ​ជាការ​ប្រកួត​ដ៏​ល្អ​មួយ​សំរាប់​ក្រុមតាមរយៈ​ការសហការ​គ្នា​យ៉ាង​ល្អ ឆ្លើយតប​នឹង​ ៣ពិន្ទុ​ដែល​ពួកយើង​ត្រូវការ​ជា​ចាំបាច់​ដើម្បី​ធានា​កៅអី​នៅ​វគ្គ​ពាក់កណ្តាល​ផ្តាច់ព្រ័ត្រ​។

ចំណែក​គ្រូបង្វឹក​ឡាវ​លោក V.Selvaraj និយាយថា ភាគច្រើន​នៃ​កីឡាករ​ក្នុងក្រុម​សុទ្ធតែ​ក្មេង​ខ្ទង់ ១៨, ១៩ឆ្នាំ​ហើយ​ខ្លះទៀត ២០ និង ២៣ឆ្នាំ​ជាដើម ដូច្នេះ​គុណភាព​នៃ​ការលេង​យើង​អាច​មើល​ពី​ភាពខុសគ្នា​ឆ្ងាយ​រវាង​ក្រុម​ទាំងពីរ​យ៉ាងណាក្តី ថ្វីបើ​ចាញ់​ប្រកួត​នេះ​លោក​នៅតែ​សរសើរ​កូនក្រុម​ដែល​ប្រឹងប្រែង​អស់ពី​លទ្ធភាព​។ ​​ជ័យជំនះ​នេះ​បានធ្វើឱ្យ​ម៉ាឡេស៊ី​ឈរលើ​គេ​ក្នុង​ពូ​ល​មាន ៦ពិន្ទុ​ពេញ​ពី​ការប្រកួត ២លើក​ ខណៈ​ឡាវ​ក្រោម​គេ​មាន ០ពិន្ទុ​របូត​គ្រាប់​បាល់​សរុប ៦គ្រាប់​។ ​ប្រកួត​បន្ទាប់​ម៉ាឡេស៊ី​ត្រូវ​ជួប​វៀតណាម​នៅ​ថ្ងៃទី១២ ខណៈ​ឡាវ​ជួប​កម្ពុជា​នៅ​ថ្ងៃទី១៥៕

​អត្ថបទ​៖​នាង សុភា​វុ​ធ