ឯកឧត្តម សាស្ត្រាចារ្យ ប៉ិច សុធី រដ្ឋលេខាធិការ ក្រសួងសុខាភិបាល បានអញ្ជើញជាអធិបតីក្នុងពិធីបើកសន្និសីទប្រចាំឆ្នាំលើកទី២ សមាគមគ្រូពេទ្យវះកាត់ជំងឺរោគស្ត្រីអង់ដូស្កុបពីកម្ពុជា (SCGO), រយៈពេល២ថ្ងៃ ចាប់ពីថ្ងៃទី៣-៤ ខែឧសភា ឆ្នាំ២០២៥។

ក្នុងសន្និសីទប្រចាំឆ្នាំលើកទី២នេះ មានការអញ្ជើញចូលរួមពីឯកឧត្តមសាស្ត្រាចារ្យ គុំ កាណាល់ ប្រធាន សមាគមគ្រូពេទ្យវះកាត់ជំងឺរោគស្ត្រីអង់ដូស្កុបពីកម្ពុជា (SCGO), រួមនឹងភ្ញៀវជាតិ អន្តរជាតិ សមាជិក សមាជិកា លោក លោកស្រីសាស្ត្រាចារ្យជាវាគ្មិនជាតិ និងអន្តរជាតិ លោក លោកស្រី វេជ្ជបណ្ឌិត គ្រូពេទ្យផ្នែកសម្ភពនិងរោគស្ត្រី។

ឯកឧត្តមសាស្ត្រាចារ្យ គាន់ អូន ប្រធានសមាគម គ្រូពេទ្យវះកាត់រោគស្ត្រីអង់ដូស្កុបពីកម្ពុជា បានមានប្រសាសន៍ថា សមាគមយើងបានរៀបចំ សន្និសីទប្រចាំ ឆ្នាំលើកទី២សមាគមគ្រូពេទ្យវះកាត់រោគស្ត្រីអង់ដូស្កុបពីកម្ពុជា ដើម្បីពង្រីកចំណេះដឹងដល់គ្រូពេទ្យផ្នែកសម្ភព រោគស្ត្រី គ្រូពេទ្យវះកាត់ទូទៅថ្នាក់ជាតិ ថ្នាក់ក្រោមជាតិ ក៏ដូចជាគ្រូពេទ្យកម្ពុជាយើងទាំងអស់ និងដើម្បីលើកកំពស់សុខមាលភាព ប្រជាជនកម្ពុជា ដែលជាព្រឹត្តិការណ៍ដ៏មានសារៈសំខាន់មួយសម្រាប់គ្រូពេទ្យកម្ពុជាយើង។ គោលបំណងសំខាន់នៃសិក្ខាសាលានេះ គឺដើម្បីផ្សព្វផ្សាយ ផ្តល់ចំណេះដឹង និងចែករំលែកបទពិសោធន៏រវាងគ្នានិងគ្នា ទៅលើប្រធានបទសំខាន់ៗជាច្រើន។ ក៏សូមថ្លែង អំណរគុណដល់ UTAH, USA និងសមាគមវះកាត់រោគស្ត្រីអាស៊ីប៉ាស៊ីភិច APAGE ដែលបានសហការគ្នា រៀបចំសន្និសីទដ៏មានអត្ថប្រយោជន៍នេះឡើង។

ឯកឧត្តមសាស្ត្រាចារ្យបានពន្យល់បន្ថែមពីសារសំខាន់នៃការវះកាត់ជំងឺរោគស្ត្រីអង់ដូស្កុប គឺជាជំនាញសល្យសាស្រ្តមួយ និងជាយុគសម័យថ្មីនៅកម្ពុជា ។

នាឱកាសនោះឯកឧត្តម សាស្ត្រាចារ្យ ប៉ិច សុធី រដ្ឋលេខាធិការ ក្រសួងសុខាភិបាល បានថ្លែងថា សន្និសីទថ្ងៃនេះគឺពិតជាព្រឹត្តិការណ៍ដ៏ពិសេសវិសាលមួយ ក្នុងការលើកកម្ពស់ នូវគុណភាព ចំណេះជំនាញអ្នកផ្តល់សេវាសុខាភិបាលកម្ពុជាយើង សំដៅធ្វើអោយមានសុក្រិតភាព​លើការអភិវឌ្ឍ​ទាំងធនធានមនុស្ស និងនវានុវត្តន៍បច្ចេកវិទ្យា។ សកម្មភាពទាំងឡាយដែលមន្ទីរពេទ្យកំពុងតែធ្វើនេះគឺស្រប និងអនុលោមទៅ តាមគោលនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិថ្មី ដែលសំដៅលើកកម្ពស់សុខភាព និងសុខមាលភាពប្រជាជនដែលជាមុំមួយដ៏សំខាន់របស់យុទ្ធសាស្ត្របញ្ចកោណ ក្នុងនោះសម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាល បានផ្តល់អាទិភាពជាយុទ្ធសាស្ត្រ ៥ គឺ មនុស្ស ទឹក ផ្លូវ ភ្លើង និងនវានុវត្តន៍បច្ចេកវិទ្យា ហើយដូចដែលមន្ទីរពេទ្យកាល់ម៉ែតបាន និងកំពុងតែធ្វើពេលនេះ។

ឯកឧត្តម សាស្ត្រាចារ្យ ប៉ិច សុធី បានសង្កត់ធ្ងន់ថា បច្ចុប្បន្ននេះមិនមែនត្រឹមតែដើម្បីសុខភាពតែមួយមុខប៉ុណ្ណោះទេ គឺត្រូវធ្វើយ៉ាងណាឲ្យមានផាសុខភាព ឲ្យស្អាត ព្រោះដល់ដំណាក់កាលដែលយើងត្រូវអភិវឌ្ឍន៍ និងត្រូវមានសោភ័ណភាពថែមទៀត។ ក្នុងនោះឯកឧត្តម រដ្ឋលេខាធិការ បានលើកឡើងនូវប្រសាសន៍របស់ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ចំនួន០២ឃ្លា តែងតែលើកឡើងថា គឺសុំឲ្យយើងទាំងអស់គ្នា អនុវត្តន៍នោះ គឺ ត្រូវតែធ្វើឲ្យបានសម្រេច ត្រូវតែធ្វើឲ្យបានល្អ។ ហើយប្រសិនបើយើងធ្វើបាន គឺយើងនឹងទទួលបានជោគជ័យនៅក្នុងវិជ្ជាជីវៈសុខាភិបាល៕ អត្ថបទ រដ្ឋា