ប្រព័ន្ធផ្សព្វផ្សាយអ៊ីស្រាអែល បានរាយការណ៍ថា យោធាអ៊ីស្រាអែល កំពុងចេញសេចក្តីជូនដំណឹងកោះហៅដល់ក្រុមបម្រុងរាប់ពាន់នាក់កាលពីថ្ងៃសៅរ៍ (០៣ ឧសភា) ដើម្បីគាំទ្រដល់ការពង្រីកប្រតិបត្តិការសឹករបស់ខ្លួននៅក្នុងតំបន់ហ្កាហ្សា បន្ទាប់ពីនាយករដ្ឋមន្ត្រីអ៊ីស្រាអែលបានប្រកាសថា ដំណើរទស្សនកិច្ចនាពេលខាងមុខរបស់លោកទៅកាន់អាស៊ែបៃហ្សង់ ត្រូវបានពន្យារពេល។

បណ្តាញព័ត៌មាន Ynet បានរាយការណ៍ថា ក្រុមបម្រុងនោះនឹងត្រូវដាក់ពង្រាយជំនួសទាហានធម្មតាទៅកាន់ព្រំដែនរបស់អ៊ីស្រាអែល ជាមួយប្រទេសលីបង់ និងនៅតំបន់កាន់កាប់ West Bank ហើយទាហានធម្មតាទាំងនោះនឹងប្ដូរទៅដឹកនាំការវាយលុកថ្មីនៅតំបន់ហ្កាហ្សា។ យោធាអ៊ីស្រាអែល មិនអធិប្បាយភ្លាមៗលើរបាយការណ៍នេះទេ។

នៅមុននោះ ការិយាល័យនាយករដ្ឋមន្ត្រីបានប្រកាសថា លោក Benjamin Netanyahu នឹងកែប្រែកាលវិភាគដំណើរទស្សនកិច្ចទៅអាស៊ែបៃហ្សង់ នៅថ្ងៃទី០៧-១១ ខែឧសភា របស់លោក ដោយលើកឡើងពីស្ថានការណ៍ផ្លាស់ប្ដូរថ្មីៗនៅក្នុងតំបន់ហ្កាហ្សា និងស៊ីរី ប៉ុន្តែមិនបញ្ជាក់ថ្ងៃបំពេញទស្សនកិច្ចថ្មីទេ។

ប្រព័ន្ធផ្សព្វផ្សាយអ៊ីស្រាអែលបានរាយការណ៍កាលពីថ្ងៃសុក្រថា គណៈរដ្ឋមន្ត្រីសន្តិសុខ បានអនុម័តផែនការសម្រាប់ប្រតិបត្តិការពង្រីកនៅក្នុងតំបន់ហ្កាហ្សាស្ទ្រីប។ ថ្នាក់ដឹកនាំរបស់អ៊ីស្រាអែលបានអះអាងថា ខ្លួនបានប្តេជ្ញាចិត្តចំពោះគោលដៅសង្រ្គាមរបស់ខ្លួនក្នុងការកម្ចាត់ក្រុមហាម៉ាស និងនាំយកចំណាប់ថ្នូរសេសសល់ ៥៩នាក់ ចុងក្រោយក្នុងដៃក្រុមហាម៉ាសនៅតំបន់ហ្កាហ្សា មកវិញ៕