ការិយាល័យនាយករដ្ឋមន្ត្រីអ៊ីស្រាអែល បាននិយាយកាលពីថ្ងៃសៅរ៍ (០៣ ឧសភា) ថា អ៊ីស្រាអែល បានអំពាវនាវដល់ប្រទេសកាតា ដែលជាអ្នកសម្រុះសម្រួលដ៏សំខាន់រវាងអ៊ីស្រាអែល និងក្រុមហាម៉ាស ឱ្យ "បញ្ឈប់ការលេងសើចរបស់ខ្លួនជាមួយភាគីជម្លោះទាំងពីរ ដោយការពិភាក្សាពីរផ្លូវរបស់ខ្លួន ហើយត្រូវសម្រេចចិត្តឱ្យច្បាស់ថា តើខ្លួនឈរនៅខាងអរិយធម៌ ឬក៏នៅខាងក្រុមហាម៉ាស"។ កាតា បានច្រានចោលសេចក្តីថ្លែងការណ៍នេះថាជា "ការបង្ករឿង"។

ទោះបីជាមានការខិតខំប្រឹងប្រែងពីអ្នកសម្រុះសម្រួលអេហ្ស៊ីប និងកាតា ដើម្បីស្ដារបទឈប់បាញ់ក៏ដោយ ទាំងអ៊ីស្រាអែល និងក្រុមហាម៉ាស មិនបង្ហាញឆន្ទៈក្នុងការដកថយចំពោះការទាមទារចម្បងរៀងៗខ្លួនទេ ដោយភាគីនីមួយៗបន្ទោសគ្នាទៅមកចំពោះបរាជ័យក្នុងការឈានដល់កិច្ចព្រមព្រៀងមួយ។

អ្នកនាំពាក្យក្រសួងការបរទេសកាតា បានបង្ហោះនៅលើបណ្ដាញសង្គម X នៅព្រឹកថ្ងៃអាទិត្យ (០៤ ឧសភា) នេះថា "រដ្ឋកាតា បានច្រានចោលយ៉ាងម៉ឺងម៉ាត់ចំពោះសេចក្តីថ្លែងការណ៍ដ៏ក្តៅគគុកដែលចេញដោយការិយាល័យនាយករដ្ឋមន្ត្រីអ៊ីស្រាអែល ដែលខ្វះស្តង់ដារជាមូលដ្ឋានបំផុតនៃការទទួលខុសត្រូវផ្នែកនយោបាយ និងសីលធម៌"។

ជាមួយគ្នានេះ ប្រព័ន្ធផ្សព្វផ្សាយអ៊ីស្រាអែលបានរាយការណ៍កាលពីថ្ងៃសុក្រថា គណៈរដ្ឋមន្ត្រីសន្តិសុខអ៊ីស្រាអែល បានអនុម័តផែនការសម្រាប់ពង្រីកប្រតិបត្តិការនៅតំបន់ហ្កាហ្សាស្ទ្រីប ដោយបន្ថែមសញ្ញាថា ការប៉ុនប៉ងសម្រេចកិច្ចព្រមព្រៀងដើម្បីបញ្ឈប់ការប្រយុទ្ធ និងការរំដោះចំណាប់ថ្នូរចេញពីក្នុងដៃក្រុមហាម៉ាស មិនដំណើរការទៅមុខទេ៕