ភាពតានតឹងកំពុងផ្ទុះឡើងជាថ្មីម្ដងទៀតនៅក្នុងតំបន់កាស្មៀរ ដែលគ្រប់គ្រងដោយប៉ាគីស្ថាន ជាទីដែលក្រុមបាតុករកំពុងតវ៉ាទាមទារឱ្យអង្គការសហប្រជាជាតិ ធ្វើសកម្មភាពប្រឆាំងនឹងអ្វីដែលពួកគេហៅថា ការបង្រ្កាបដ៏ឃោរឃៅដោយកងកម្លាំងឥណ្ឌា។

បាតុកម្មទ្រង់ទ្រាយធំមួយបានផ្ទុះឡើងនៅទីក្រុង Muzaffarabad នៃតំបន់កាស្មៀរ ដែលគ្រប់គ្រងដោយប៉ាគីស្ថាន កាលពីថ្ងៃសុក្រ ០២ ឧសភា ត្រូវបានរៀបចំឡើងដោយក្រុម APHC ដែលជាសម្ព័ន្ធ ២៦ក្រុមនៃអង្គការនយោបាយ សង្គម និងសាសនា ដែលជារណសិរ្សនយោបាយរួបរួមមួយដើម្បីលើកឡើងពីបុព្វហេតុនៃឯករាជ្យភាពតំបន់កាស្មៀរ ដែលមានជម្លោះ។

ក្រុមអ្នកតវ៉ាតំណាងឱ្យផ្នែកជាច្រើនទូទាំងសង្គម ដែលរួមមានសិស្ស និស្សិត ពាណិជ្ជករ អ្នកដឹកជញ្ជូន និងក្រុមគ្រួសារជាច្រើន ហើយក្រុមបាតុករទាំងនោះអំពាវនាវឱ្យអង្គការសហប្រជាជាតិជួយអន្តរាគមន៍ ដោយនិយាយថា សាច់ញាតិរបស់ពួកគេនៅក្នុងតំបន់កាស្មៀរ គ្រប់គ្រងដោយឥណ្ឌា កំពុងប្រឈមមុខនឹងការយាយី ការចាប់ខ្លួនតាមអំពើចិត្ត និងការផ្តន្ទាទោស បន្ទាប់ពីការវាយប្រហារលើអ្នកទេសចរដែលសម្លាន់មនុស្ស ២៦នាក់។

នៅពេលដែលផ្ទះសម្បែងត្រូវបានកម្ទេច ការចាប់ខ្លួនកើនឡើង និងការភ័យខ្លាចនៃសង្គ្រាមកាន់តែក្ដៅគគុក ពលរដ្ឋកាស្មៀរនៅក្រុង Muzaffarabad និយាយថា ពិភពលោកមិនអាចនៅស្ងៀមបានទៀតទេ ព្រោះប្រសិនបើកាស្មៀរ ត្រូវបានបំភ្លេចចោលម្តងទៀត នោះផលវិបាកអាចនឹងធ្ងន់ធ្ងរខ្លាំងលើសពីការរំពឹងទុក៕