ក្រុមមន្ត្រីបាននិយាយថា រថយន្តមួយគ្រឿងបានបើកបុកច្រកចូលអាកាសយានដ្ឋានក្នុងទីក្រុងម៉ានីល របស់ហ្វីលីពីន នៅព្រឹកថ្ងៃអាទិត្យ (០៤ ឧសភា) នេះ បណ្តាលឱ្យមនុស្ស ២នាក់ស្លាប់ ក្នុងនោះមានក្មេងស្រីម្នាក់ផងដែរ។ កាកបាទក្រហមហ្វីលីពីន និយាយថា ក្មេងស្រីនោះមានអាយុ ៤ឆ្នាំ ប៉ុន្តែរដ្ឋមន្រ្តីដឹកជញ្ជូន Vivencio Hizon បាននិយាយថា ក្មេងស្រីរងគ្រោះនោះអាយុ ៥ឆ្នាំ។

អាជ្ញាធរនិយាយថា មនុស្ស ៣នាក់ផ្សេងទៀត បានរងរបួសនៅក្នុងឧបទ្ទវហេតុនេះ ហើយកំពុងព្យាបាលនៅក្នុងមន្ទីរពេទ្យ។ អ្នកបើកបររថយន្តត្រូវបានឃុំខ្លួន នេះបើតាមប្រតិបត្តិករអាកាសយានដ្ឋាន New NAIA Infra Co។

បុគ្គលិកសង្គ្រោះបន្ទាន់រាប់សិបនាក់ចុះទៅប្រតិបត្តិការនៅឯអាកាសយានដ្ឋានអន្តរជាតិ Ninoy Aquino ជុំវិញរថយន្ត SUV ពណ៌ខ្មៅមួយគ្រឿង ដែលបានបុកជញ្ជាំងព្រលានតាមច្រកចូលមួយ។ ប្រតិបត្តិករព្រលានយន្តហោះនិយាយថា ខ្លួនកំពុងសម្របសម្រួលជាមួយអាជ្ញាធរដើម្បីស៊ើបអង្កេតលើឧប្បត្តិហេតុនេះ៕