វិមានក្រឹមឡាំង បាននិយាយនៅថ្ងៃអាទិត្យ (០៤ ឧសភា) នេះថា ប្រធានាធិបតីចិន លោក Xi Jinping នឹងធ្វើទស្សនកិច្ចផ្លូវការទៅកាន់ប្រទេសរុស្ស៊ី ចាប់ពីថ្ងៃទី០៧ ដល់ថ្ងៃទី១០ ខែឧសភា ខាងមុខនេះ ដើម្បីចូលរួមក្នុងការប្រារព្ធខួបលើកទី៨០ នៃការកម្ចាត់ពួកណាហ្ស៊ីអាល្លឺម៉ង់។

នៅក្នុងសេចក្តីថ្លែងការណ៍មួយនៅលើតេលេក្រាម វិមានក្រឹមឡាំងបាននិយាយថា លោក Xi នឹងពិភាក្សាជាមួយប្រធានាធិបតីរុស្ស៊ី លោក Vladimir Putin អំពីការអភិវឌ្ឍភាពជាដៃគូយុទ្ធសាស្ត្ររបស់ប្រទេសទាំងពីរ ក៏ដូចជាការចុះហត្ថលេខាលើឯកសារមួយចំនួនផងដែរ។

វិមានក្រឹមឡាំងបាននិយាយថា "ក្នុងអំឡុងពេលនៃកិច្ចពិភាក្សានោះ បញ្ហាចម្បងនៃការអភិវឌ្ឍបន្ថែមទៀតលើទំនាក់ទំនងនៃភាពជាដៃគូទូលំទូលាយរវាងរុស្ស៊ី និងចិន ព្រមទាំងអន្តរកម្មយុទ្ធសាស្ត្រ ក៏ដូចជាបញ្ហាបច្ចុប្បន្ននៅលើរបៀបវារៈអន្តរជាតិ និងតំបន់ នឹងត្រូវលើកយកទៅពិភាក្សា"។

មេដឹកនាំជាតិជាច្រើនរូបផ្សេងទៀតត្រូវបានគេរំពឹងថានឹងមានវត្តមានក្នុងការប្រារព្ធពិធីជ័យជម្នះក្នុងសង្រ្គាមលោកលើកទី២នេះ រួមទាំងប្រធានាធិបតីប្រេស៊ីល និងស៊ែរប៊ី និងនាយករដ្ឋមន្ត្រីស្លូវ៉ាគី។ គួររម្លឹកថា សហភាពសូវៀតបានបាត់បង់មនុស្ស ២៧លាននាក់ នៅក្នុងសង្គ្រាមលោកលើកទី២ ប៉ុន្តែបានរុញច្រានកងកម្លាំងណាហ្ស៊ី ឱ្យត្រឡប់ទៅទីក្រុងប៊ែរឡាំងវិញ ជាទីដែលមេដឹកនាំ ហ៊ីត្លែរ បានធ្វើអត្តឃាត ហើយបដាជ័យជម្នះសូវៀតពណ៌ក្រហម ត្រូវបានលើកឡើងនៅលើ Reichstag ក្នុងឆ្នាំ១៩៤៥៕