ជនជាតិប៉ាឡេស្ទីនយ៉ាងតិច ៥៧នាក់ បានស្រេកឃ្លានដល់ស្លាប់ នៅតំបន់ហ្កាហ្សា ខណៈការដាក់ទណ្ឌកម្មរបស់អ៊ីស្រាអែល ចំពោះការបិទជំនួយស្បៀងអាហារ ទឹក និងគ្រឿងផ្គត់ផ្គង់សំខាន់ៗផ្សេងទៀតដល់តំបន់ឡោមព័ទ្ធនេះ អូសបន្លាយដល់ខែទី៣ ស្របពេលការទម្លាក់គ្រាប់បែកឥតឈប់ឈរ។

ការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សា បាននិយាយកាលពីថ្ងៃសៅរ៍ (០៣ ឧសភា) ថា ជនរងគ្រោះភាគច្រើនជាកុមារ ក៏ដូចជាអ្នកជំងឺ និងមនុស្សវ័យចំណាស់ ដោយថ្កោលទោសអ៊ីស្រាអែលចំពោះ "ការបន្តប្រើប្រាស់ស្បៀងអាហារជាអាវុធនៃសង្គ្រាម" និងជំរុញឱ្យសហគមន៍អន្តរជាតិដាក់សម្ពាធលើអ៊ីស្រាអែល ឱ្យបើកព្រំដែនឡើងវិញ និងអនុញ្ញាតឱ្យមានជំនួយចូលទៅហ្កាហ្សា។

ដែនដីហ្កាហ្សា បានស្ថិតនៅក្រោមការបិទផ្លូវរបស់អ៊ីស្រាអែលទាំងស្រុង ចាប់តាំងពីថ្ងៃទី០២ ខែមីនាមក ខណៈវីដេអូប្រព័ន្ធផ្សព្វផ្សាយបានបង្ហាញពីរថយន្តដឹកទំនិញជាច្រើនគ្រឿងដែលផ្ទុកជំនួយសំខាន់ៗ បានតម្រង់ជួរនៅតាមព្រំដែនរវាងអេហ្ស៊ីប និងហ្កាហ្សាស្ទ្រីប កាលពីថ្ងៃសៅរ៍ លាតសន្ធឹងទៅភាគខាងត្បូងហួសពីទីក្រុង Arish ដែលមានចម្ងាយប្រហែល ៤៥គីឡូម៉ែត្រ ពីច្រកព្រំដែនក្រុង Rafah។

ខណៈដែលការបិទផ្លូវជំនួយនៅតែបន្ត អង្គការសហប្រជាជាតិបាននិយយាថា កុមារជាង ៩.០០០នាក់ ត្រូវបញ្ជូនទៅមន្ទីរពេទ្យដើម្បីព្យាបាលកង្វះអាហារូបត្ថម្ភធ្ងន់ធ្ងរចាប់តាំងពីដើមឆ្នាំនេះមក។ អ្នករាយការណ៍ព័ត៌មានរបស់ Al Jazeera បាននិយាយថា ដែនដីប៉ាឡេស្ទីននេះបានឈានដល់ចំណុច "ដ៏ធ្ងន់ធ្ងរ" ដោយអង្គការអន្តរជាតិអស់ការផ្គត់ផ្គង់ស្បៀង ហើយផ្ទះបាយសហគមន៍ មិនអាចរៀបចំអាហារសម្រាប់ជនភៀសខ្លួនបានទៀតទេ៕