ស៊ីហ្គេម៖ គណៈកម្មាធិការជាតិអូឡាំពិកកម្ពុជា (NOCC) បានរៀបចំ «កម្មវិធីគុណតម្លៃអូឡាំពិក» ដើម្បីផ្សព្វផ្សាយចំណេះដឹងកីឡាជូនដល់សិស្សានុសិស្សរយៈពេល ២ថ្ងៃកាលពីថ្ងៃទី៩-១០ ខែធ្នូ ឆ្នាំ២០២១ នៅខេត្តកែប ពិសេសដើម្បីបញ្ជ្រាបការផ្សព្វផ្សាយអំពីយុទ្ធនាការឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជាតែម្ដង។
លោក ប៊ុយ សុភ័ណ្ឌ គ្រូឧទ្ទេសប្រចាំវគ្គអប់រំគុណតម្លៃអូឡាំពិក នៃគណៈកម្មាធិការជាតិអូឡាំពិកកម្ពុជាបានបញ្ជាក់ថា វគ្គនេះមានសិស្សានុសិស្សប្រមាណ ១០០នាក់ចូលរួមដោយ NOCC បានលើកយកប្រធានបទសំខាន់ៗជាច្រើនមកបង្ហាញ ទី១ ការធ្វើបទបង្ហាញលើការអប់រំគុណតម្លៃអូឡាំពិក ការប្រកួតកីឡាអូឡាំពិក និងការអប់រំចលនាអូឡាំពិក។ ទី២ គឺយុទ្ធនាការផ្សព្វផ្សាយការអប់រំសង្គម «ប្រជាជនម្នាក់លេងកីឡាមួយមុខ» «ជៀសឆ្ងាយពីគ្រឿងញៀន» «យល់ដឹងពីបញ្ហាគ្រោះថ្នាក់ចរាចរណ៍» «កម្ពុជាស្អាត និងបដិសណ្ឋាកិច្ចល្អ» នៃដំណើរឆ្ពោះទៅទទួលរៀបចំធ្វើជាម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣។ ទន្ទឹមជាមួយគ្នាលោក ងិន សុខបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា ដែលជាប្រភេទកីឡាត្រៀមទទួលរៀបចំស៊ីហ្គេមឆ្នាំ២០២៣ នៅខេត្តកែប ក៏បានចូលរួមចែករំលែកនូវចំណេះដឹង និងការជំរុញសិស្សានុសិស្សចូលរួមលេងកីឡា ដើម្បីមើកកម្ពស់សុខុមាលភាព ទាំងផ្លូវកាយ និងផ្លូវចិត្ដ ពិសេសដើម្បីរួមចំណែកគាំទ្រដំណើរឆ្ពោះទៅព្រឹត្តិការណ៍ជាប្រវត្តិសាស្ដ្រនៅកម្ពុជា ពិសេសគឺដល់កីឡាទ្រីយ៉ាត្លុងនឹងរៀបចំកាប្រកួតផ្ទាល់នៅខេត្តកែបផងដែរ។
ជាមួយគ្នានោះ សិស្សានុសិស្សទាំងអស់បានសម្តែងនូវក្តីរីករាយ និងចូលរួមយ៉ាងផុសផុលក្នុងកម្មវិធីអប់រំគុណតម្លៃអូឡាំពិក ដែលជាកម្មវិធីប្រចាំឆ្នាំមួយរបស់គណៈកម្មាធិការជាតិអូឡាំពិកកម្ពុជា ដើម្បីបញ្ជ្រាបការផ្សព្វផ្សាយអំពីចលនាអូឡាំពិក គុណប្រយោជន៍នៃការលេងកីឡា និងការផ្សាភ្ជាប់ជាមួយយុទ្ធនាការឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
