នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃអាទិត្យ ៤ ឧសភា បានប្តេជ្ញាឆ្លើយតបលើក្រុមហ៊ូទី(Houthi) របស់យេម៉ែន និងក្រុមគាំទ្រអ៊ីរ៉ង់របស់ពួកគេ បន្ទាប់ពីក្រុមឧទ្ទាមបានវាយលុកតំបន់អាកាសយានដ្ឋានសំខាន់របស់អ៊ីស្រាអែល បណ្តាលឲ្យមនុស្ស ៦ នាក់រងរបួស និងជំរុញឱ្យមានការផ្អាកជើងហោះហើរ។

ការវាយប្រហារនេះបានកើតឡើងប៉ុន្មានម៉ោងមុនពេលកងទ័ពរបស់អ៊ីស្រាអែលបានបញ្ជាក់ពីការកោះហៅទាហានបម្រុងរាប់ម៉ឺននាក់ ដើម្បីពង្រីកសង្រ្គាមរយៈពេល១៩ ខែនៅតំបន់ហ្កាហ្សាប្រឆាំងក្រុមសកម្មប្រយុទ្ធប៉ាឡេស្ទីន ហាម៉ាស ។      

យោធាបានបញ្ជាក់ថា ការវាយប្រហារដែលបានបណ្ដាលឲ្យមានរណ្ដៅធំមួយនៅតំបន់ជុំវិញអាកាសយានដ្ឋាន Ben Gurion នៃទីក្រុង Tel Aviv ត្រូវបានបាញ់ចេញពីប្រទេសយេម៉ែន ហើយបានវាយប្រហារ           បើទោះបីជាមានការប៉ុនប៉ងជាច្រើន ក្នុងការស្ទាក់ចាប់មីស៊ីលក៏ដោយ។ 

នៅក្នុងវីដេអូ ដែលបានផ្សព្វផ្សាយនៅលើបណ្ដាញសង្គម Telegram លោក Netanyahu បាននិយាយថា អ៊ីស្រាអែលបានធ្វើសកម្មភាពប្រឆាំង ក្រុមឧទ្ទាមដែលគាំទ្រដោយអ៊ីរ៉ង់ កាលពីអតីតកាល ហើយ នឹងចាត់វិធានការនៅពេលអនាគត។

ក្រោយមក លោក Netanyahu បាននិយាយថាលើបណ្ដាញសង្គម Xថា អ៊ីស្រាអែលក៏នឹងឆ្លើយតបចំពោះអ៊ីរ៉ង់វិញផងដែរ នៅក្នុងពេលវេលា និងទីកន្លែងនៃការជ្រើសរើសរបស់អ៊ីស្រាអែល។

ក្រុមហ៊ូទី ដែលនិយាយថា ពួកគេធ្វើសកម្មភាពក្នុងការគាំទ្រពលរដ្ឋប៉ាឡេស្ទីនអំឡុងសង្គ្រាមនៅហ្កាហ្សា បានអះអាងទទួលខុសត្រូវចំពោះការវាយប្រហារនោះ៕